DOH ILOCOS KINIDDAWNA MANEN ITI ‘4 O’CLOCK’ BAYAT NGA AGPANGATO DAGITI KASO TI DENGUE

March 1, 2025 Headlines

MALASIQUI, Pangasinan

Inawagan ti Departament of Health – Ilocos Region (DOH-1) dagiti amin a yunit ti lokal a gobierno (LGUs) ken dagiti ahensia a papigsaenda dagiti panagregget iti pananglapped iti dengue babaen ti panangisayangkat iti inaldaw a
panagikkat kadagiti lugar a pagitlogan ti lamok iti alas 4 ti malem. “Iyugalitayo a dalusan ti aglawlawtayo tapno awan ti pagitlogan dagiti lamok, nga isuda ti kangrunaan nga agaw-awit iti dengue virus. Daytoy ket tapno masalakniban ti bagitayo ken ti pamiliatayo.

Ti pannakidangadang iti dengue ket maysa a panagtitinnulong a panagregget a pakairamanan ti aktibo a pannakipaset ti tunggal maysa,” kinuna ti direktor ti DOH-1 a ni Paula Paz Sydiongco iti maysa a pagsasao idi Huebes. Kinunana a ti opisina ti rehion ket naipaimanan dagiti suplay a kontra-dengue kadagiti LGUs idi Hulio 2024, a pakairamanan dagiti misting machine, backpack sprayer, insektisidio, ken Olyset nets. Dagitoy ti mangpatibker kadagiti agdama a lokal a panagregget, nangnangruna kadagiti lugar a mapaspasaran iti panagadu dagiti kaso ti dengue.

Dagiti LGU ket nangipatungpaldan kadagiti vector control measures, a mairaman dagiti linawas a clean-up drive ken dagiti panag misting kadagiti publiko a lugar tapno mangkissay kadagiti populasion ti lamok. Sigun iti Regional
Epiemiology and Surveillance Unit, 884 a kaso ti dengue ti nairekord manipud Enero 1 agingga iti Peb. 15, 2025 —
doble iti naipadamag a 441 kaso iti isu met laeng a panawen idi 2024. Iti Pangasinan ti addaan iti kangatuan a bilang nga addaan iti 447 a kaso, a sinaruno ti LA Union (176), Ilocos Sur (134), Ilocos Norte (71), ken Siudad ti Dagupan (56).

(HA-PNA Ilocos/PMCJr.-ABN)