DOH, MAMAKDAAR TI PUBLIKO KONTRA LEPTOSPIROSIS, DENGUE ITI BAET TI PANAGLAYUS A GAPUANAN NI “KRISTINE”

November 1, 2024 Headlines

SAN FERNANDO CITY, La Union

Gapu ta nailumlom ti dadduma a paset ti Rehion ti Ilocos iti danum ti layus gapu iti bagyo a Kristine, ipakdaaran ti
Department of Health – Center for Health Development Ilocos (DOH CHD-1) ti publiko kontra iti leptospirosis ken dengue. Segun kenni DOH CHD-1 Medical Officer IV Rheuel Bobis, ipakita ti historical data ti health department nga umad-adu ti kaso ti leptospirosis ken dengue no adda ti layus.

Impaganetget ni Bobis ti pananglapped ken pinaregtana ti publiko nga agsanay kadagiti nadumaduma a wagas kas iti panangliklik a tumapog kadagiti narugit wenno kontaminado a danum, panangsanay iti nasyaat a personal a kinadalus, panangdalus kadagiti sugat ti saka, ken saan mga uminum manipud kadagiti posible a kontaminado a pagtaduan ti danum. “No saan a maliklikan, siguraduen a nakasuotka iti proteksion kontra iti danum ti layus a kas iti overall ken rubber boots ti mangngalap,” kinuna ni Bobis iti maysa nga interbiu idi napalabas a Biernes.

No bilang ta addan ti maysa nga indibidual iti naisarang iti kontaminado a danum, indagadag ni Bobis nga agkiddaw a dagus iti medikal a balakad ken umno nga agas tapno malapdan ti leptospirosis. Iti sabali a bangir, gapu ta iti
Aedes aegypti, wenno lamok nga agaw-awit iti dengue ket agnanaed kadagiti natalna a danum, pakdaaran met ti DOH ti publiko kontra iti dengue. Mabalin nga aramiden ti publiko ti sumagmamano a pamay-an ti panangsalaknib iti bagina kas iti panagsuot iti atiddog a manggas ken pantalon ken panagusar kadagiti losion a manglapped iti insekto.

Impaganetget ni Bobis a napateg met ti panagbirok ken panangdadael kadagiti pagpaaduan dagiti lamok apaman a bumaba ti danum ti layus. No agtultuloy dagiti sintoma ti dengue, kas iti gurigor, rashes, ken panagpadara, agdardaras nga agturong iti kaasitgan nga ospital sakbay a kumaro ti kaso, a mabalin a pakaigapuan ti komplikasion wenno nakarkaro pay Pinasingkedan ni Bobis a nakasagana dagiti pasilidad ti salun-at ti rehion a mangawat kadagiti posible a pasiente. Kasta met, inbinglayna a nangipaulog ti DOH iti direktiba kadagiti ospital a manglukatda iti fast lanes para kadagiti kaso ti leptospirosis ken dengue.

(CGCC-PIA Ilocos/PMCJr.-ABN)