DOH NAGBABALA SA MAHILIG MAGPA-TATTOO

March 1, 2025 Metro BLISTT

BAGUIO CITY

Masakit, marumi, mapanganib sa kalusugan, at higit sa lahat, hadlang sa pagkuha ng magandang trabaho, ito ang
ilan sa mga karaniwang paniniwala noon tungkol sa mga tattoo. Ayon kay Butch San Diego ng Butch Tattoo Studio, “Noon, oo, malaking isyu ito, lalo na kapag papasok ka sa simbahan, parang nakakailang, kaya kailangan mong magsuot ng damit na may manggas, pero ngayon, tanggap na ito ng lipunan.” Sa kasalukuyan, maraming kompanya ang hindi na itinuturing na isyu ang pagkakaroon ng tattoo sa kanilang mga empleyado.

Katunayan, ibinahagi ni Kath Tiñozo, isang advisor II sa email support, “Sa BPO industry, matagal nang tanggap ang tattoo. Pakiramdam ko, walang diskriminasyon dito. Bago pa man ako pumasok sa industriya, marami na akong
kakilalang may tattoo.” Para sa mga tattoo artist, isang uri ng sining ang tattoo at sa loob ng mahigit 12 taon,
naging bahagi na ng trabaho ni Jhay-Arr ang paggawa ng tattoo. Sa kabila ng patuloy na pagsikat ng tattoo, mahalaga pa rin ang kaligtasan, lalo na sa kalusugan.

May ilang nakakaranas ng impeksyon, allergy, at iba pang negatibong epekto. Isa sa mga pangunahing dahilan nito ay ang paggamit ng hindi malinis na kagamitan sa pagtatattoo. Maaari ring maipasa ang mga sakit gaya ng HIV at Hepatitis B at C sa pamamagitan ng kontaminadong karayom. Nakasaad sa Senate Bill No. 2141 o ang Body Piercing
and Tattooing Regulation Act ang mga kinakailangan para sa mga tattoo artist at tattoo shop, kabilang ang pagkuha ng permit mula sa Department of Health (DOH).

Inaasahan ng DOH na sumusunod sa tamang hygiene at safety standards ang mga tattoo shop at kagamitan nila.
Samantala, ang Senate Bill 1126 o ang Tattoo Patrons Protection Act of 2010 ay naglalayong protektahan ang mga nagpapalagay ng tattoo. Responsibilidad ng mga tattoo artist na tiyakin ang kaligtasan ng kanilang mga kliyente bago, habang, at pagkatapos ng proseso ng tattooing. Dapat ding maturuan ang mga kliyente ng tamang pangangalaga sa kanilang tattoo upang maiwasan ang impeksyon.

Ipinagbabawal ang pagpapalagay ng tattoo sa mga menor de edad, mga may partikular na kondisyon sa balat, at iba pang itinuturing na nasa panganib. Ang mga lumalabag ay maaaring pagmultahin mula P100,000 hanggang P500,000 o makulong ng isa hanggang apat na taon at maaari ring mawala ang lisensya ng mga tattoo artist na hindi sumusunod sa batas.

Glenn Marc Dulay/ UB-Intern