Domogan, nagbabala sa pasaway na kontraktor

LUNGSOD NG BAGUIO – Hindi na natiis pa ng ilang residente at motorista ang mga nakatiwangwang na mga proyekto sa kalsada sa mga barangay ng lungsod na iniwan ng pasaway na mga kontraktor kaya idaing nila sa tanggapan ni Mayor Mauricio G. Domogan.

Bago pa dumating ang tag-ulan ay sinimulan na ang pagbubungkal ng ilang kalsada sa mga barangay ngunit nagreklamo ang mga residente at motorista dahil napansin nila na wala nang nagtatrabaho at iniwanan na lang bastang nakatiwangwang ang hindi pa madaanan na kalsada. Partikular na nagpunta upang magreklamo sa tanggapan ng mayor ang mga residente ng Pinget at Military Cut-off.

Ayon naman sa panayam ng Amianan Balita Ngayon kay Pinget Punong Barangay Pablo Pawi, “pansamantala muna hininto ang trabaho dahil walang tauhan ang kontraktor, ipaparating muna ito sa administrasyon kung paano ang magiging sitwasyon nitong proyekto.”

Sinabi naman ng mayor na nangako si Engr. Rene f. Zarate, officer-in-charge ng District Engineering Office ng DPWH-CAR, na tututukan ang mga proyekto na matapos sa panahon na nakalagay sa kontrata. “Now if they won’t then iti-terminate nila yung kontrata at ibigay sa ibang contractor or administration will take over,” babala ni Domogan.

Ipinaliwanag ni Domogan sa kanyang lingguhang ugnayan na bago naipasa ang Republic Act 9184 o Government Procurement Reform Act ay napagkasunduan kasama ang chairman ng Pre-qualification, Bids and Awards Committee (PBAC) na ang mga kontraktor na may pending project o proyektong hindi pa natatapos, sa national man o lungsod ang pagmumulan ng funding, ay hindi maaaring maki-bid.

Hindi rin pwedeng ipa-sub-contract ang isang awarded project sa ibang contractor, aniya.

“Sa awarding ng project, only one project can be awarded to one contractor during one bidding para mapigilan natin yung posibilidad na ginagawa ng mga ibang contractor just participate and participate in the bidding tapos nanalo siya ng apat na project pero wala siyang manpower to implement these projects kaya ipa-sub-contract mo na lang o ibenta mo na lang sa ibang contractor.

“Anong klaseng istilo na ganyang negosyo kaya ang nangyayari naisasakripisyo ang quality ng project, dahil sa limited ang kanyang manpower kaya ganyan ang nangyayari. Sinabi ko sa present PBAC ngayon, natatakot raw sila kasi under the procurement law walang legal basis na gawin nila yan. Ginagawa namin yan before, why they cannot do it?” pahayag ni Domogan.

“Tingnan ninyo ngayon may isang contractor na kahit na ilang bidding manalo sa apat na project, what do you expect? Natural, made-delay yung implementasyon.

“So, I ask the member of the city council a while ago to enact the ordinance that will incorporate what we are saying para maresolba natin itong problema,” saad ng mayor. ABN

Amianan Balita Ngayon