Droga, may katapusan pa kaya?

August 20, 2017 Daplis Walang Mintis Opinion

Marahil hirap nating sagutin ang tanong na ito: kung kailan matatapos ang problema sa salot na illegal drugs sa ating lipunan. Alam ng sang-munduhan na saka lang ito nahalukay nang husto nang umupo si Pres. Duterte. Alam din ng lahat na matagal na ang salot na ito at marami na ang naging biktima sa ating lipunan. Kaya noon hanggang ngayon, salot pa rin ito. At inuulit natin ang tanong: may katapusan pa kaya ang talamak na droga sa sosyodad?

*********

Marami na ang namatay dahil sa illegal na droga. Marami na rin ang kampanya ng gobyerno, noon hanggang ngayon, pero patuloy na namamayagpag  ang naturang isyu. Bakit? Kulang pa ba ang ngipin ng batas? O baka naman nabungi ang mga batas pati na ang mga nagpapatupad nito? O baka naman natapalan ng pera kaya nakakalusot? Kung ganun, ang pinaka-salarin sa salot na ito ay hindi sa droga kundi… pera! Sabi nila habang marami ang kumakagat sa kinang ng pera, hindi mapupuksa ang mga karumal-dumal na krimen lalo na kung may kinalaman sa droga. Marami na ang naging prueba o patunay o ebidensiya sa tandem ng pera at droga kung bakit hindi mapuksa-puksa. Dahil sa kinang ng pera, marami ang nagkukutsabahan. Ibig sabihin, marami ang nagiging bulag, bingi, pipi at walang kaluluwa. In short, bangag na sila sa droga, bangag pa rin sa pera kaya kahit pa sa bunganga ng kanyon, wala na silang kinatatakutan. Para bang matamis na sa kanila ang kamatayan, dahil, marami na silang pinatay dahil sa droga.

*********

Nang sinimulan ng Duterte administration ang kampanya nito kontra illegal na droga, marami ang natumba, nakulong, nakasuhan at napagbago. Pero hanggang sa ngayon, marami pa ring hindi takot sa naturang kampanya. Bulto-bulto pa ring droga ang nakukumpiska. Isama na ang palusutan kung saan idinadaong ang mga drogang ito. Ang pinakahuli nga na iniimbestigahan ng Senado at Kamara ay ang paglusot ng tone-toneladang shabu sa kustom na nagkakahalaga ng P6.4billion.  Grabe at marahil, ito na ang pinaka-malaking bulto ng drogang nakalusot. Galing ito sa Tsina.  At ang masaklap, mas marami pang bulto ang sinasabing nawawala at bilyon din ang halaga. Sabi ng mga taga-kustom, nahihirapan daw silang bantayan ang galaw ng droga sa kustom dahil maraming tao ang nasisilaw sa pera. Kaya nga’t ang sigaw ng ilang mambabatas…dapat ay magresign na si Com. Faeldon ng BOC. Pero, kinabig naman siya ni Digong. So, papaano na mga pards? May mga ulo kayang pagugulungin sa kustom? Kailan? Kapag, marami na ang patay dahil sa droga?

*********

Sabi kamakailan ni Pres. Digong, alanganin siyang masusugpo niya ang illegal na droga sa kanyang termino. Ang dahilan, nasaksihan niyang mga higante ang kalaban, lalo pa’t maraming galamay sa buong bansa. Kaya nga’t sa isang dinaluhang pagtitipon, kanyang ipinakita muli ang kanyang listahan ng mga taong-gobyerno na sangkot sa droga (diumano). Dapat daw ay maubos ang mga ito. Hindi lingid sa madla na marami ng taga-gobyerno ang pinatay. Ang mga ito ay may pagkakasangkot diumano  sa illegal na droga. Sino ang pumapatay? Papaano naman kaya ang mga buhay na nakalista? Susunod din kaya silang mauutas? Hanggang kailan ang utasan? Kapag patay na ba lahat ang mga yan, tahimik na ang bansa hinggil sa illegal na droga? Hanggang kailan magwawakas ang patayan at  pamamayagpag ng droga sa ating sosyodad? Ang kasalukuyang administrasyon kaya ang solusyon? O, dagdag hiwaga sa droga? Abangan! Adios mi amor, ciao, mabalos!