Duterte, hindi nila tinatantanan!

April 29, 2017 Daplis Walang Mintis Opinion

Habang tumatagal sa Palasyo si Pres. Duterte lalong nagkakasala-salabat ang mga tangkang siya’y pabagsakin bilang pangulo. Kaliwa’t-kanan ang mga batikos at paninira. Ang pinakahuli ay ang isinampang kaso sa ICC (International Criminal Court) dahil daw sa paglabag sa karapatang pantao. Itinaon pang may ASEAN Summit dito sa bansa. Kaya sabi ng ilang analysts: hindi kaya gusto lang hiyain ang pangulo kung saan hindi lang Pilipinas ang host ng ASEAN kundi si Pres. Digong pa ang “chairman” ng naturang pagtitipon? Sabi pa nila kung may malasakit ang nagsampa ng kasong ito sa ICC dapat man lang sana ay pinatapos muna nila ang summit. Nakataya dito ang kahihiyan, hindi lang kay Duterte, kundi ng buong bansa. Ayon nga kay Sen. JV Ejercito, ang hakbang na ito ay pagpapakita ng pagsasabwatan ng ilan para wasakin ang kredibilidad ng pangulo. Malaki ang paniwala ng karamihan sa mga senador na hindi uusad at hindi magtatagumpay ang kasong naturan. Sabi nga ni Senate Majority Leader Vicente Sotto, hindi raw nakakabahala ang kaso at mahihirapan itong magtagumpay. Sa panig naman ni Sen. Panfilo Lacson, madidismaya lamang ang mga nasa likod ng pagsasampa ng kaso laban sa Pangulo doon sa ICC lalo pa’t kung ibinabatay lamang ito sa testimonya nina Edgar Matobato at dating SPO3 Arturo Lascanas. Kasi raw, “polluted at perjured witnesses” sila. Papaano mo raw paniniwalaan ang mga taong pabago-bago ang pahayag?”

******

Katatapos lang manguna bilang most influencial person sa buong mundo si Pres. Digong, inupakan na naman siya ng mapaghamong mga Abu Sayyaf. Mantakin mong pinugutan nila ng ulo ang dinukot nilang isang sundalo? Natural, umusok na naman ang butsi ni Digong. Kaya nag-utos na siyang patayin lahat ang natitira pang mga terorista sa Bohol. At nagbunga naman ang banta nito. Nakahuli sila ng malaking isda at talagang dambuhalang isda ire, pards. Koronel ng PNP ang nasakote. Maryusep. Babae pa pards. At asawa ng isang bomb expert na Abu Sayyaf member. Mariakusina. Sabi nga ni PNP Chief, sleeping with enemy si Koronel Maria Cristina Nobleza. So ibig sabihin kasabwat o kasama si Coronel sa mga operasyon ng ASG sa kidnapping for ransom. Kaya imposibleng hindi siya kahati sa mga ransom nilang nakukulimbat, ayon sa ilan, sus ginoo. Ang isang pulis, pards, ay nanumpa sa tungkulin bilang protector ng buhay at ari-arian ng sambayanan pero si Nobleza, protector daw ng mga teroristang kalaban ng gobyerno at salot ng bayan. Kaya pala di maubos-ubos ang mga ASG, sabi nila kasi may mga kasabwat na pulis? Aray, dapat busisihing maigi ang kasong ito. Mabigat na parusa dapat sa mga taong nagtatraydor sa bayan, di ba?

******

Habang matindi ang kampanya ni Pres. Duterte kontra droga, sumasabay naman ang mga kaso (raw) nito gaya ng human rights violation at extra judicial killings. At hindi lang yan, may bagong bomba, pards. May suhestiyon si Vice President Leni Robredo na i-decriminalize na lang ang kasong droga. Hanooo??? Maryunes! Parang gusto niyang gawing legal na ang droga sa Pilipinas? Nakupo, di lalong darami ang mga dupang, pushers at drug lords? Sabi ng ulat, gusto raw niyang tularan natin ang Portugal kung saan ang solusyong ginawa sa problema nila sa iligal na droga ay ginawa na lang legal, na-decriminalized. Dahil dito marami ang bumabanat kontra sa stand ni VP Leni kasama na ang VACC. Hayy naku, panginoon, nasa kamay niyo na ang solusyon sa aming mga problemang samutsari. Adios mi amor, ciao, mabalos!