Duterte, nainsulto sa ASEAN Summit?

Tapos na ang 31st Association of Southeast Asian Nation Summit (ASEAN) na ginanap sa ating bansa. Nagwakas din ang mga kontrobersiya. What??? Maryusep, totoo na sandamukal ang mga kontrobersiya habang ginaganap ang ASEAN Summit. Isa-isahin natin ang mga ire, pards pero bato-bato sa langit muna hane?

******
Unang kontrobersiya ay noong bago dumating ang mga delegados o kinatawan ng mga bansang kasama sa naturang summit. Siyempre, gaya ng nakagawian, linis dito at doon ang ginawa. Itinago ang mga pangit na eksena gaya ng mga sidewalk vendors at kauring ayaw ipabuking sa mga bisita. Ewan kung saan dinala ang mga pobreng kababayan natin. Sabihin man nating iligal sila, pero bakit ngayon sila pinaalis? Dapat sana ay noon pa raw sila pinagbawalan sa lugar na malapit sa PICC. He he, agaammotayon, sabi nila. Pakitang gilas. Tapos ngayong tapos na ang summit, may mga kumento na di raw sila pinaalis o itinago. Di pa alam  kung pababalikin sila sa dating gawi o hindi na. Hayy buhay nga naman. Kawawa naman kaming mga pangit, laging itinatago para di makita ng mga magagandang pwe!

******
Ikalawang kontrobersiya, nang magsimula na ang summit, bumanat din ang mga militante. Kaliwa’t-kanang protesta ang ginawa. Nagkasakitan pa nga sa panig nila at otoridad. Bakit sino bang pinoprotesta?  Si US Pres. Donald Trump daw. Ayaw nila sa buhok niya,  este pagmumukha niya. Marami pa silang ayaw kaya umeksena ang grupong ito. Buti na lamang walang nalagas na buhay. Tapik ng ilan: dapat sana, sa tahimik na paraan na lamang nila ipinarating ang kanilang daing upang walang tensiyon. Sabat naman ng mga daldal: kung tahimik, pakikinggan  kaya sila? A, ewan. Only in the Philippines. Ngayong tapos na ang summit, tahimik na rin ang lahat. Kahit pa sunugin nila lahat ang pagmumukha ng mga kagalit nila gaya nina Trump at Digong, wala ng mangyayari. Relaks na lang mga igan. Hintayin natin kung ano ang ibubunga ng mga pinag-usapan sa summit na yan. Kung magkatotoo, good. Kung sablay, protesta ulit!

******
Ikatlong kontrobersiya, isang pinay, beauty queen pa mandin at artista ang umeksena ng sablay. Mantakin mong ASEAN Lane, pinasok. Nagtanggal pa ng barikada sa daan saka nagmamayabang pang binagtas ang bawal na lane na para lang sa mga komboy ng mga delegado. Ang resulta: iniimbestigahan na sa ngayon. Habang sinusulat ang espasyong ito, di pa alam kung masususpendi o makakansela na ang drivers’ license ng beauty queen na ire. Ang masaklap, meron pa itong dapat panagutan dahil security risk ang kanyang ginawa. Paano raw kung binanatan siya ng mga otoridad? Malaking gusot at kahihiyan ito. Magsorry man siya, meron na siyang paglabag sa ating batas. Sabi nga nila, dapat mapanagot sino man siya upang hindi panularan. Amen!

******
Isa pang kontrobersiya: nainsulto raw si Pres. Duterte sa ginawa ni Canadian Prime Minister Justin Trudeau dahil sa komento nito (Trudeau) hinggil sa bilang ng mga namamatay sa war on drugs ng Duterte administration at EJK – extra judicial killings. Upak nga ni Digong: “I said I will not explain. It is a personal and official insult. That is why you hear me throwing down epithets, curses, pagmumura and everything because it angers me. When you are a foreigner, you do not know exactly what is happening in this country. You do not even investigate. You only show before the United Nations a record of how  persons died you claim to be extra judicial. You can investigate, find out the truth.” Yan ang sipa ni Digong kay Trudeau sa isang press conference. Sus maryusep! Magkaibigan na sina Trump ng US at Digong pero sa Canada naman ngayon ang may namumuong giyera ng dila! Abangan ang upakan!  Adios mi amor, ciao, mabalos!

Amianan Balita Ngayon