ELEKSIYON SA DISYEMBRE… MALINAW O MALABO?

September 24, 2022 Opinion

Ito ang mabigat na tanong: talaga bang malinaw o Malabo ang sinasabing barangay at SK election sa Dec.
2022? Marami ang nagsasabing malinaw na…pero marami rin ang nagsasabing malabo pa. Bakit Kamakailan, ayon sa ratsada ng Lower House….sa kanilang ikatlo at pinal na deliberasyon … kanilang
napagkasunduan na ia-atras ang Brngy/SK elections sa Dec. 2023.

Linawin natin na ang stand na ito ay sa mga mambabatas natin sa mababang kapulungan. Ano naman kaya ang pulso ng Senado o mataas na pulong? Kung sasang-ayon sila sa ratsada ng House…ano naman kaya ang pinal na sundot ng ating Pangulong Bongbong? Kaya sabi ng marami….sa panahong ito,
mahirap pa ang lumundag agad sa konklusyon. Hirit nga nila…eh, yong last minute sa basketball ay marami pang magaganap na milagro…sa pulitika pa kaya?

Pero teka lang mga pards…bago natin balikan ang isyu ng eleksiyon, marami sa mga Filipino community sa US ang nasiyahan sa pagdalaw sa kanila ni Pres. Bongbong Jr. Ang maganda…inamuki ng pangulo ang mga magagaling nating mga scientists/technologists na bumisita naman sa ating bansa at tumulong sa ating pag-usad sa larangang ng negosyo. Malamang kaysa hindi, marami sa kanila ang tumango dahil nandito pa rin ang kanilang mga kaanak na may mga negosyo rin sa kasalukuyan.

Kung sa mensahe ng pangulo sa kanyang pagharap sa UN General Assembly…kauna-unahan sa South East Asia….kanya ring inilatag ang kanyang concern sa pagkakaisa at tulungan ng mga bansa. Ang mabigat dito ay sinabi ng pangulo na ang Pilipinas ay kaibigan ng mga bansa sa mundo. Masarap at matamis namnamin ang katuturan ng mensahe ng Pangulong Bongbong lalo na sa pagkakaisa at pagtutulungan. Ang tanong: kung kaibigan ng Pilipinas ang lahat ng bansa…tayo kaya ay kaibigan din
nila? Di kaya may mga bansang sinasamantala din tayo? Ginagawa tayong lungga ng kanilang mga pasaway na kababayan?

Isang maliwanag na ehemplo ang nangyayari sa POGO …itong Offshore gaming na nasa ating bansa. Pinapatakbo ito ng mga dayuhan. Pati mga empleado nila ay galing din sa kanilang bansa. At natuklasan kamakailan na illegal at kulang sila ng dokumento upang dito magtrabaho at manirahan. Matagal na itong ginagawa, di ba? Hindi ba maliwanag na tayo’y pagsasamantala ng mga dayuhang ito? Meron pang mga ulat na may mga dayuhang nahuhuli at kinakasuhan sa ibat-ibang krimen sa bansa.

Di ba pagsasamantala sa ating kabaitan ang kanilang ginagawa? Tayo ang tagilid. Dahil ang ating mga kababayan ay dumadaan sa proseso bago makapagtrabaho sa ibang bansa? Totoo na maliit lang ang
Pilipinas…pero nakakapuwing ang maliit, di ba? Balikan natin ang Barangay/SK election. Marami ang nagsasabi na dapat matuloy na sa Dec. 2022 ang halalan para mapalitan ang mga bulok at walang silbing mga opisyal ng barangay.

Kung mananatili pa sila, lalong magkakaroon ng dagdag na pasanin ang ating mga kababayan. Dapat sila palitan at kung may sala, parusahan. Sabi naman ng iba…masyadong magastos kung tuloy ang election
kasi lalabas bale na dalawang eleksiyon ang naganap sa loob ng isang taon. Dapat daw ay sa Dec. 2023 na para makapaghanda nang husto. Sabagay…ngayon pa lang, marami na siguro ang mga namumuhunan upang magkapera sa eleksiyon.

Kung papano, sila lang ang nakakaalam. Bastat sa ganang amin…hindi makakalusot ang ano mang anomalya sa mga eleksiyon dahil mulat na ang bayan. Batid na ni Juan dela Cruz ang mga kalakaran
sa pulitika. Dahil sa kinang ng pera, nawawala ang tunay na diwa ng serbisyo publiko. Adios mi amor,
ciao, mabalos.