Ex-Pres. Aquino, kinasuhan sa Mamasapano! Owss!

November 11, 2017 Daplis Walang Mintis Opinion

Maryunes!!! Sandamukal na kilay ang bumagsak nang malamang nagsampa raw ng kaso ang Ombudsman kontra Ex-Pres. Noynoy Aquino. Isa na ang grupong VACC sa mga nagmaktol. Pero siyento porsiyentong nanggagalaiti sa galit at inis ang mga naulila ng SAF 44. Sa kabilang panig naman, tiyak na masaya sila dahil nagawa ng Ombudsman na sampahan ng kaso ang dating pangulo dahil sa Mamasapano. At least daw, nakasuhan. He he, teka muna raw mga pards. Himayin muna natin daw kung ano-ano bang mga kaso ang isinampa kontra kay Pinoy? Graft at usurpation of official function!  Sus maryusep a tuglep!  Yon lang??? Yap! Yun lang! Ooopps huwag ka munang humirit. Yun lang talaga. Wala ng iba. Anak ng bakang di pa tuli! Ganern??? Yap! Ganern nga! Kulit! Daplis: Owsss!!!

******

Sige, bumanat ka na, pards. Ibunghalit mo na ang nangangalit mong reaksiyon sa mga kaso ni Pinoy. Unahin natin ang graft  case na may piyansang trenta mil. Ikalawang kaso ang usurpation (the tyrannical assumption of the government by force contrary to and in violation of the constitution of the country, The Free Dictionary by Farlex) na may piyansang sampung libo. Pero sandali lang pards, kalma muna bago ka ma-highblood. Basa ko ang utak mo, pards. Ganyan din ang upak ng mga kinatawan ng VACC. Papaano ka nagkaroon ng kasong usurpation eh, siya ang presidente? Upak nga ni Pres. Duterte, kung ikaw ang pangulo, saklaw mo na lahat ng karapatan na puwede kang sumang-ayon o komontra. Alam naman ni Pnoy na sa panahong yun, suspendido si dating PNP Chief  Alan Purisima. Bakit siya pumayag na isagawa ang Oplan Exodus? Kung hindi na ninyo maalaala, si Purisima ay nasuspende dahil umano sa anomaly sa courier service sa lisensiya ng mga baril. Nauna nang sinampahan ng kaso ang kapwa akusado ni Pnoy na sina Purisima at dating SAF Director Getulio Napenas. Tanong: sino ang dapat managot sa kamatayan ng SAF 44? Di ba may nag-utos? Bakit daw ang kaso niya ay graft at usurpation lang? May inihaing reklamo noon ang mga kaanak ng SAF-44 sa Ombudsman kontra Aquino na reckless imprudence resulting in homicide (multiple) pero hindi kinatigan ng anti-graft body dahil wala umanong matibay na ebidensiya. Oh, my God! Ano pa bang klase ng ebidensiya ang hanap, sabat ng marami!

******

Dahil sa ginawa ng Ombudsman, naglutangan ang mga haka-haka mula sa hanay ng mga analyst at legal luminaries. Baka daw ganyan ang ginawa upang sa bandang huli ay mapapawalang-sala si Aquino at sina Purisima at Napenas na lang ang madidikdik. Tapik nila: kung ang nautusan ay natiklo sa isang krimen, hindi ba’t may pananagutan din ang nag-utos o mastermind? Hindi ba’t kung nagbenta ka ng nakaw, pati ang bumili ay pinaparusahan din ng batas? E, bakit yung nautusan lang ang maiipit sa Mamasapano? Wala bang pananagutan ang nag-utos kung 44 na buhay ang nagbuwis? Yan ang argumento mula sa kampo ng mga naulila ng SAF 44. Lalo kung maalaala nila na nang dumating ang mga bangkay ng mga biktima ng masaker ay wala ang dating pangulo at may ibang pinuntahan. Masakit yun para sa mga naulila at saksi ang buong sambayanan sa pangit na eksenang ito. Ngayon at nakasuhan si Aquino ng mga kasong taliwas sa inasahan ng marami, sinong matutuwa? At kung magkakatotoo ang hinala na baka mapapawalang-sala rin siya, malaking dagok ito sa kasaysayan ng mga krimen sa ating bansa.  Pres. Duterte, may magagawa kaya sa isyung ito? Abangan! Adios mi amor, ciao, mabalos!