Final demand sa Uniwide, ipapadala ng lungsod

March 17, 2018 Metro BLISTT

Iniutos ni Mayor Mauricio G. Domogan sa mga kinauukulang tanggapan ng lokal na gobyerno na magpadala ng final demands sa management ng Uniwide Realty and Sales Development Corporation kung interesado o hindi ang kompanya na ituloy ang matagal nang naantalang plano sa pagpapaunlad ng pamilihan ng lungsod.
Sinabi ng mayor na kailangang linawin ng Uniwide ang kanilang interes na ituloy ang pagpapaunlad ng pamilihang lungsod sa gitna ng isyu ng insolvency ng kompanya sa nakabinbing apela sa Court of Appeals (CA).
Nauna rito, nagpahiwatig ng intensiyon ang Uniwide na isagawa ang development project sa pamilihang lungsod matapos ideklara ng Supreme Court (SC) ang constitutionality ng market ordinance ng lungsod at ang validity ng development contract na pinasok ng lokal na pamahalaan at ng kompanya noong Agosto 1996.
“We are sending our final demand to Uniwide to ascertain its capacity to pursue the market development project as input into our decisions in the coming months. Our market really needs the appropriate development to be at par with the market facilities of other major cities and first-class towns in the north,” diin ni Domogan.
Aniya, kailangang tiyakin ng lokal na pamahalaan kung legal o hindi na makisosyo ang Uniwide sa mga korporasyon sa pagpapaunlad ng pamilihan sa gitna ng nakabinbing isyu sa insolvency kung saan umapela ang kompanya sa ruling ng lower court sa CA.
Ayon pa sa kaniya, napag-iwanan na ang pamilihang lungsod sa aspeto ng pagpapaunlad sa katulad na market facilities sa ibang major cities at first-class municipalities sa hilaga.
Idiniin niya ang kahalagahan ng well-developed public market na siyang madalas puntahan ng mga residente at turista sa lungsod.
Nauna rito, lumikha ang local legislative body ng komite upang pag-aralan ang mas magandang hakbang sa pagpapaunlad ng pamilihang lungsod.
Sinabi pa ni Domogan na ang pagkaantala sa development ng pamilihang lungsod ng halos dalawang dekada ay nagresulta ng napakalaking kawalan sa parte ng lokal na pamahalaan, lalo na sa pagbibigay sa mga lehitimong vendor ng mas mainam na espasyo at ang publiko na may maluwang na lugar upang makapag-transact ng negosyo na kapaki-pakinabang sa pagpapaunlad sa pasilidad ng lungsod
Umaasa si Domogan na ang Uniwide management ay agad na tutugon sa final demand ng lokal na pamahalaan upang makapagplano ang mga opisyal sa susunod na hakbangin.
Ang Uniwide ay ang nag-iisang bidder nang isagawa ng lokal na pamahalaan ang bidding para sa P1.7 bilyon na proyekto sa pagpapaunlad ng pamilihang lungsod ngunit ang mga concerned vendors ay nagtatanong sa constitutionality ng ordinansa at ang bisa ng kasunod na kontrata na pinirmahan sa pagitan ng developer at ng lungsod. Baguio PIO / ABN