Firefighters ng Cordillera, sinanay ng US experts

January 28, 2019 Provincial

TUBA, Benguet – Isangdaan at walong tauhan ng Bureau of Fire and Protection mula sa mga lalawigan ng rehiyong Cordillera ang sumailalim sa limang araw na fire and rescue training na isinagawa ng Firefighters for Christ (California), na ginanap sa Asin Hotspring, sa bayang ito.
Ito ang ikaapat na fire and rescue training na isinagawa ng mga bihasang dayuhang firefighters sa bansa sa ilalim ng Training Camp Philippines 2019 ng BFP National Headquarters, na ang una ay sa Quezon City, Bacolod, Davao at Cordillera.
Tatlong mga makabagong training techniques ang itinuro sa mga participants, na gaya ng Swift Water Rescue, na ang facilitators ay sina  Danny Rodriquez, Bob Ameche at Simon Hewiit; Wild Land Fire Management, ang facilitators ay sina Joe Lindaman, Patrick Stilson at Tom Nichols; at ang Auto Extrication, na ang facilitators ay sina Luis Carlos at Dave Kromka.
Ayon kay Fire Senior Superintendent Maria Sofia Mendoza, regional director, ang training ay napakalaking tulong para sa BFP personnel na magkaroon ng karagdagang mga techniques para sa fire and rescue training.
“Hindi lang sa fire nakatuon ang aming tauhan, kundi sa ngayon ay sinasanay na sila sa rescue operation, dahil alam naman natin na ang BFP ang isang nag-reresponde sa isang insidente. Gaya ngayon tinuturuan sila kung paano baklasin ang isang sasakyan para iligtas ang pasahero sa aksidente at paano magresponde at apulahin ang isang wild fire o forest fire,” pahayag ni Mendoza.
Aniya, napakasuwerte ang BFP sa Cordillera na makatanggap ng kakaibang training at mapalakas pa ang abilidad ng mga bumbero sa larangan ng sunog at mga sakuna. Bukod dito ay ang swift water rescue na malaking tulong sa panahon ng pagbaha.
“Ang mga personnel natin ay may regular na training at aminado tayo na may konting kulang sa kagamitan, pero ngayon ang mga dalang kagamitan ng mga facilitators ay ibibigay na sa amin, kaya napakalaking tulong ito sa BFP,” dugtong pa ni Mendoza.
Ayon naman sa trainor na si Joe Lindaman, napili nila ang Cordillera dahil malimit maganap ang aksidente, lalong-lalo na sa vehicular accident at sa dala nilang makabagong kagamitan ay mabilis na mare-rescue ang na-trap na biktima sa loob ng sasakyan.
“I salute to all the participants, madali silang turuan at aktibo sa training. Ang aming kaalaman sa makabagong techniques ay nais naming ibahagi sa personnel ng BFP sa Pilipinas,” ayon pa kay Lindaman.
Zaldy Comanda/ABN