Foundation Anniversary ti San Fernando City naitantan

Headlines

SIUDAD TI SAN FERNANDO – Iti nareskediyul nga pasamak para iti 22nd Foundation Anniversary ti daytoy nga siudad tata Marso ket naitantanen.

Idi Biernes (Marso 7), iti opisyal a panangyusuat iti cityhood anniversary ket naangay babaen iti anunsio ti tema ita a tawen ken press presentation iti 19 a kandidato para iti Search for Miss City of San Fernando.

Ngem agsapa idi Marso 9, nangiruar ni San Fernando Mayor Alfredo Pablo R. Ortega iti maysa nga opisyal a paragawag nga mangkumkumpirma nga dagiti nailatang nga aktibidades ket maitantan kalpasan nga pirmaan ni Presidente Rodrigo Duterte ti executive order nga nangideklara iti maysa a public health emergency gapu iti pangta ti coronavirus disease (COVID-19).

“In light of the declaration of COVID-19 with the alert level Code Red (sublevel 1) a National Public Health Emergency, the City Government of San Fernando, La Union, is postponing the scheduled Foundation Anniversary Events from March 10-31, 2020, until further notice (gapu iti deklarasion ti COVID-19 nga addaan alert level Code Red (sublevel 1) kas National Public Health Emergency, itantantan ti City Government iti San Fernando City iti nayeskediul a Foundation Annivbersary Events manipud Marso 10-31, 2020 agingga ada paragawag),” kuna ni Ortega.

Iti baratillo nga agsubsubli ita a tawen ket masuspindi epektibo Marso 11 tapno maikkan iti panawen dagiti contractor ken negosiante nga mangipakni iti toldada. Nangrugi daytoy idi Marso 7 ken agibus koma inton Abril 5.

Iti napalabas, iti central business district ti siudad ket napunno iti tattao nga bumisbisita iti baratillo ken mangkita kadagiti napintas a kalidad nga produkto nga nalaka’t presio na.

Maysa pay, maabisuan iti umili nga aguray iti anunsio wenno direktiba mainaig iti panakasuspindi iti kalse, no adda man.

Kabayatanna, allukuyen ti city government dagiti residente nga aramiden dagiti pananglapped nga uddang kas iti kanayon a panagugas iti ima, umno nga etiketa iti panaguyek, distansia kadagiti tattao, saan nga panagbiahe, ken panangtantan kadagiti taripnong.

Dagiti residente nga addaan travel history ken sintomas iti respiratory ket manamnama nga makitinnulong kadagiti health authorities’ nga surutenda iti protocols.

Dagiti entrada ken pagruaran sadiay city government ket maaddaan kadagiti hygiene stations tapno malappedan ti iwawaras iti sakit. Dagiti pasdek ti negosio ket maallukoy met nga aramidenda met daytoy nga uddang.

“Rest assured that your city government’s top priority is your health, safety, and security (ipasigurado ti gobierno ti siudad nga kangrunaan unay iti salun-at, talged ken seguridadyo),” kuna ni Ortega.

Iti tema ti foundation anniversary ti siudad ita a tawen ket, “San Fernando, Ay-ayaten Ka.”

 

JND-PIA LU/PMCJr.-ABN