Gobernador Pacoy, nangiwaras iti ayat iti San Gabriel, LU

May 7, 2017 Provincial

Nangipaay iti ragsak ken ayat ti Probinsial a Gobierno ti La Union (PGLU) nga idadauloan ni Gobernador Francisco Emmanuel “Pacoy” R. Ortega III kadagiti umili ti San Gabriel, La Union babaen iti I Love La Union, “I Love My Barangay” outreach program a naisayangkat idi Abril 28, 2017 iti San Gabriel Municipal Auditorium.
Iti bitlana, inyebkasna iti panagyamanna kadagiti umili ti San Gabriel nga idadauloan ni Mayor Herminigildo M. Velasco gapo iti agtultuloy a panagarakupda kaniana agraman iti kapusona a ni ABONO Party-list Representative Vini Nola A. Ortega. Inyunay-unayna nga datoy nga ayat ket agtultyuloy met laeng a mapaayan met laeng iti ayat babaen iti naduma-duma a programa, proyekto ken aktibidad iti panagdur-as. Pinadayawanna pay iti agtultuloy a panagpannakkel dagiti umili iti kulturada kas kameng iti Indigenous Peoples (IP). Insiguradona iti talek iti PGLU iti kabaelan dagiti IP kas iti panagatalekna kenni Dr. Geoffrey S. Tilan, iti Provincial Administrator iti PGLU.
Sakbay iti bitla ni Gobernador Pacoy, nagyaman met ni Provincial Population Officer Mila Laudencia-Gamboa, focal person iti “I Love La Union, I Love My Barangay,” iti suporta iti Munisipio iti San Gabriel a pangpanguloan ni Mayor Velasco iti nasao nga outreach program. Inpalagipna a dagiti bukel iti nateng a naipaay iti outreach program kadagiti barangay ket umaydanto pasyaren kalpasan a maimula ken dumakkel tapno maikkan dagiti mannalon iti naan-anay a tarabay. Datoy ket kas panagipaay iti suporta iti San Gabriel a mabigbigbig nga Upland Vegetables Capital of La Union a napateg a paset iti La Union Central Tourism Circuit. Iti nasao a lawlaw ket maysa a Core Strategy iti La Union Transformative Governance Roadmap tapnu magun-od iti probinsia iti sirmata a “La Union, the Heart of Agri-Tourism in Northern Luzon by 2025.”
Ti “I Love La Union, I Love My Barangay” ket dati a maaw-awagan iti Operation Rang-ay iti Barangay (ORB) a pinadur-as ni pasado Gobernador Manuel “Manoling” C. Ortega. Tapnu agtultuloy iti naalibtak a panagipaay iti tulong, pinadakkel pay ni Pacoy iti nasao a programa a naipaayen iti siudad ti San Fernando ken ili ti Bangar, Aringay, Santol, Caba ken San Gabriel. Israel O. Rudio, PITO-LU / ABN