“Killer Maid” nadakip matapos ang tatlong taon pagtatago

February 10, 2019 Headlines

LUNGSOD NG SAN FERNANDO, LA UNION – Naaresto ng mga operatiba sa Alaminos City, Pangasinan ang itinuturong suspek na “killer maid” sa brutal na pagpaslangsa alagang 15 anyos na dalagita.
Kinumpirma ni Police Superintendent Mary Crystal Peralta, chief information officer ng Police Regional Office 1 (PRO1), ang pagkakadakip kay Marites Judan, pangunahing suspek sa pagpaslang sa dalagitang si Allery Wagayen noong Mayo 2016.
Ang suspek ay kasambahay ng mga magulang ng biktima sa Pinsao Barangay, Baguio City. Ayon kay Peralta, si Judan ay naaresto ng mga pulis sa Dampay Street, Alaminos City sa bisa ng isang warrant of arrest noong Pebrero 6,2019.
Napag-alaman din na ang suspek ay may tatlong nakabinbin na warrants of arrest sa Lungsod ng Baguio para sa robbery homicide ni Wagayan, at kaso ng adultery at theft sa Balaon at San Fernando, La Union.
Hinihimok ngayon ni Peralta kung may iba pang biktima ang naturang suspek upang lumantad at makipag-ugnayan sa mga pulis. Aniya, mas maraming kaso ng suspek sa Sta. Cruz, Ilocos Sur at Bangar, La union ang inaasahang lilitaw para sa kasong qualified theft.
Sinabi ni Peralta na maraming alyas ang ginagamit ni Judan at naperpekto na nito ang modus ng pagpapanggap bilang kasambahay at kalaunan ay nanakawan at sasaktan ang walang muwang na pamilya.
Sa Baguio City, si Judan ang primary suspect sa pagpaslang ng 15 anyos na babae sa loob ng kanilang tahanan sa Pinsao Barangay.
Ang naturang pagpaslang ay umani ng pagkapoot sa lungsod at pagbuhos ng suporta sa pamilya ng biktima. Ang walang buhay na katawan ng dalagitang biktima ay nakitang may 13 na saksak at lumalangoy sa sariling dugo sa loob ng kanilang banyo.
Sina Roger at Arnold, ang mga kaanak na nakakita sa katawan ni Allery, ay sinabing dumating sila sa bahay mula sa paghahatid ng tubig sa kanilang customer nang masalubong si Judan sa parking area. Sa pahayag ng dalawa, si Judan ay may bitbit na blue bag at nagmamadaling sinabihan sila na ihatid siya sa market para makuha ang sahod mula sa nanay ng biktima.
Ang dalawang lalaki ay pumayag na sumakay ang suspek sa kanilang L300 van patungo sa market ngunit nang malapit na sila sa Naguilian Road ay biglang humiling na ibaba ito at pupunta na lamang umano sa market nang mag-isa, na pinayagan naman ng dalawa. Umuwi sina Roger at Arnold at nadiskubre ang walang buhay na katawan ni Allery.
Sinabi ni Peralta na kabilang sa mga alyas ni Judan ay Marites Rilloraza, Florence Macalay, Marites de Guzman, Brenda Mendoza at Brenda Ducusin.