Gov. Pacoy, nagsapata kas VP ti Tokhang Coalition

July 17, 2017 Headlines

INKARI ni La Union Gov.  Francisco Emmanuel  “Pacoy” R. Ortega III ti natibtibker pay a suportana a makigubat iti maiparit a droga kalpasan a nagsapata daytoy kas Interim Vice President ti National Tokhang Advocacy Coalition (NTAC) for Luzon kabayatan ti selebrasion iti 22nd Police Community Relations Month (PCR) ti Philippine National Police (PNP) idi Hulio 9, 2017 sadiay PNP Transformation Oval, Camp Crame, Quezon City.
Ti selebrasion ket addaan tema a “Police and Community: sharing responsibility, taking action in unity”.Lima nga organisasion ti nairusat kas paset ti National Coalition ti PNP advocacy groups tapno mapabileg pay ti kampanya kontra illegal drugs.
Nagserbi kas guests of honor and speaker ni Police Director General (PDG) Ronald “Bato” M. Dela Rosa ken ni Undersecretary Catalino S. Cuy a nangyussuat iti National Tokhang Advocacy Coalition (NTAC), Anti-Crime and Community Emergency Response Team (ACCERT), National Coalition of Information Technology Advocates for Change (NCITAC), Association of Chiefs of Police of the Philippines Inc. Affiliated Non-Government Organizations (ACPPIAN), ken ti Foreign Nationals Keeper Network (FNKN).
Pinirmaan ni Governor Pacoy ti maysa a kari a mangipakpakita ti suportana iti gubat kontra droga. Kinunana nga ipangpangruna ti administrasionna ti naan-anay a pananggibus iti maiparit a droga iti probinsia ti La Union. Kasapulan daytoy tapno masustenar ti kappia ken urnos, ken tapno manteneren ti La Union kas Cleanest, Greenest, and Safest Province in Region I, kuna ti gobernador.
Inyebkas met ti PNP ti panagyamanda kadagiti suporta ti partner agencies, NGOs, sabali pay a law enforcement agencies, lokal nga opisial, ken dadduma pay a mangsupsuporta iti panangipatungpal dagiti linteg iti pagilian. MARCEL A. FLORENTINO, PITO-La Union / ABN