Grade 8 pupil, nabaril ng Grade 5 sa Benguet

LA TRINIDAD, BENGUET – Aksidenteng nabaril ng isang grade five pupil ang isang grade 8 pupil sa Linang, Bedbed, Mankayan, Benguet noong umaga ng Pebrero 21 (Miyerkules).
Ang nakatatandang lalaki, 14 anyos, ay mahigpit na sinusubaybayan sa Luiz Hora Hospital sa Bauko, Mt. Province dahil sa tinamo nitong gunshot wound sa kaliwang pisngi sa ilalim ng mata nito.
Ayon sa mga pulis na nagsiyasat, ang biktima ay nagising sa dalawang putok ng baril na umalingawngaw dakong 10:30am, at pagkatapos ay narinig niya ang batang lalaki na isinisigaw ang pangalan niya at sinasabihang lumabas sa bahay at tignan ang hawak nitong baril.
Lumabas ang biktima sa bahay at dumiretso sa banyo kung saan ito sinundan ng batang suspek at pagkatapos umihi ng biktima ay ipinakita ng 11 anyos na suspek ang hawak nitong baril na itinutok nito sa biktima.
Sinabi diumano ng 14 anyos na huwag itutok sa kanya ang baril at nang tangka sana nitong hawakan ang baril ay pumutok ito.
Nang naramdaman ng biktima ang dugo na dumaloy sa kanyang ilong at bibig ay tumakbo ito papunta sa isang nagngangalang Demeterio Diastan upang magpasaklolo.
Agad dinala ang biktima sa Mankayan Infirmary Clinic at kalaunan ay inilipat sa ospital sa Bauko.
Ang 11 anyos na suspek ay isinangguni kay Mankayan social welfare assistant Joan Gangaey, habang ang caliber 38 revolver na may tatlong bala at tatlong empty shells ay kinumpiska ng Mankayan police. AALEGRE / ABN

Amianan Balita Ngayon