Gunguna kas National Rice Achievers Awardee, maawat ti LU

May 7, 2017 Headlines

SIUDAD TI SAN FERNANDO, LA UNION – Maysa a National Trophy ken cheque nga aggatad ti P4 milion ti awaten ti probinsia kas 2016 National Rice Achievers Awardee inton maika-23 ti Mayo 2017 sadiay Philippine International Convention Center (PICC) iti Pasay, Metro Manila.
Manamnama a dumar-ay tapno umawat iti nakuna a pammadayaw da Governor Francisco Emmanuel R. Ortega III, Assistant Provincial Agriculturist Myrna O. Picazo ken Rural-Based Organization Provincial Focal Person Justino F. Casuga.
Ti La Union ket nabigbig kas national awardee kalpasan nga inpakaammo ti National Screening and Evaluation Team (NSET) manipud iti Department of Agriculture (DA) ti resulta babaen ti maysa a surat ti panagkablaaw iti email ti opisina ti gobernador.
Kalpasan daytoy ti nagsasaganad nga evaluation ken assessment kadagiti nagduduma a paset ti Provincial Rice Program (PRP) idi 2016. Nairehistro ti probinsia ti pakabuklan a 175,373 metric tons iti rice production nga adda 1.95porsyento a ngimatuanna no maidilig iti tawen 2015 a 172,000 metric tons. Ngimmato met ti contribution iti regional rice production nga 9.71% kumpara iti 9.68% idi 2015.
Ti nangatngato a rice production ket maigapu iti awan sarday a suporta ti probinsial a gobierno ti La Union (PGLU) kadagiti mannalon babaen ti panangipaay kadagiti mausar iti panagtalon, panangited kadagiti soil ameliorants ken foliar fertilizers, red rice production babaen ti organic agriculture program, trichoderma production, vermicomposting, farmers capacity-building sessions, ken transfer of technologies iti regular Farmer’s Field School (FFS).
Kadwa ti La Union nga umawat iti pammadayaw dagiti probinsia ti Pangasinan, Nueva Vizcaya, Bulacan, Nueva Ecija, Compostela Valley, ken Lanao del Norte. Mario Eliseo O. Casimiro, Governor’s Press Corps / ABN