Habagat!

Ditoy siudad ti Baguio, probinsia ti Benguet ken kababingabang a lugar, napasaran ti epekto ti HABAGAT, napigsa a
bayakabak a kasla maibuybuyat a kunada. Adda pay kasingin na nga angin a kunam no agbagyo. Kagiti adu a kalsada, adu ti nareggaay wenno na-landslide.

Natebbag dagiti kalsada iti bakrang ti bantay, dimmakkel ti danum kadagiti dalan ti danum kas iti karayan, wenno dadakkel a kanal.

Adu a rason ti ibagbaga dagiti residente. Adda mangibaga a gapu kadagiti basura kadagiti nasao a kankanal. Malagip tayo ti city camp lagoon a tunggal panagtotodo idi ket malayos ti nasao a lugar. Ngem idi natarimaan ti pagruaran ti
danum ken naikkan iti makuna nga screen na, saanen a kas idi a tunggal agbagyo wenno panagtotodo ket agbakbakwit dagiti agindeg.

Ngem adda daydi tawen a nalipus manen dagiti babbalay iti nasao a lugar ta nag-clog manen ti nasao a dalan ti danum ket ditoy. Nagadu manen a plastic ti basura ti naipullat.

Agpipinnabasol manen dagiti adjacent barangay. Sadino man papagayam, kaarruba ti nagtaudan dagitoy a basura, adda latta dagiti iresponable a kailian tayo. Ngem pagimbagan na laengen ta naipatungpalen ti ordinansa iti siudad nga “no plastic policy” iti merkado publiko.

Kayat na a sawen, bawalen wenno maipariten ti panagusar iti plastic wenno usaren dagiti establisamento. Pasig aminen a papel wenno agitugot kan iti bukod mo a pagikkan iti pinalengkem, ta no saan echo bag ti ilako da kenka.

Tunggal dumteng ti kastoy a panawen, adu a didigra wenno natural calamity ti intay mapaspasaran. No asino la ti pabpabasolen tayo. Agtitinnudo. Adda pay diay mangpabasolen iti namarsua, ngem no panunoten, adda met laeng kadatayo a tattao.

Aklonen tayo man wenno saan, dakkel ti kontribusyon tayo a tattao iti mapaspasamak no maminsan ta idi un-unana awan met dagita a kalamidad nangruna iti reggaay. Ta idi , napuskol pay laeng ti kaykayo iti bantay. Adu pay laeng dagiti dadakkel a kayo a mangtengngel iti nabuslon a todo na.

Adda dagiti ramut a mangtengngel iti daga tapno malapdan ti reggay ken flash flood ngem gapu ta saan nga ammo nga ipateg ti tao ti parabor ti Apo kadatayo, isu daytan.

Kanayon tayo a madakamat ti panagbaliwen ti panawen gapu iti Global Warming. Gapu iti global warming, adda ti makunkuna a climate change wenno panagbaliw ti paniempona. Kanayon a madakamat dagiti rasones.

Ngem, ti sapspaulen tayo ket ania ba ti programa ti gobierno tapno maisubli ti kinangayed ti aglawlaw? Kasla awan mabasbasa tayo wenno mabuybuya ken mangmanggeg iti radio maipapan iti reforestation wenno pamnangisubli iti kinadalus ti aglawlaw babaen iti panagmula tayo iti kayo.

Habagat…ania ba a talaga daytoy? Adu ti mangikarkararag a sumardeng koman ngem adu met ti mangidawdawat nga agnepnep koman tapno makatalon da, nangruna dagiti mangnamnama laeng iti todo tapno makaraep da.

Idi, malagip ko, bulan pay laeng ti Mayo agbunubon kamin ket apagtapug ti Hunyo, agtalon kamin. Ngem ita, Agoston ngem kalkalpas pay laeng nga agtalon dagiti daddduma a lugar.

Kasla nga awanen namnama dagiti sirmata tayo ken tagtagainep tayo a kinangyed ti aglawlaw ta no ibasarko laeng ita iti siudad kalpasan ti aguppat a dekada a kaaddatayon ditoy siudad, kadagitoy laengen naglabas a dua dekada ti kaadda dagiti nakaro a didigra.

Sirmata ken Tagtagainep ni Mang Gusting

Amianan Balita Ngayon