Hay, Apo aya?

June 10, 2019 Opinion Sirmata ken Tagtagainep ni Mang Gusting

Hay Apo aya, kailian, kakayong, kaarruba, gagayyem ken kagurgura. Kumusta kayo metten kadagiti batug yo a langit? Ania’n aya a kinapasaway dagiti kailiantayo idi napalabas a lawas.

Intay man napadaplisan ti maipapan iti pannakapukan dagiti nasurok a kuarenta a pine tree iti siudad ti baguio tapno mawayaan ti pagatakderanda iti pasdek ngem agrasonda latta.

Kayong, nagmula da kanu met iti pine tree iti kabangibang nga ili. Apay kasla building a manu laeng nga aldaw ket tumakderen? Adu a tawen ti palabsen sakbay a dumadakkel.

Adda panangbabalaw da iti liderato iti siudad ta apay a napalubosan a napukan dagitoy. Uray pay ngata no kuna da a tinungpal da ti requirements tapno makaala da iti makuna a cutting permit.

Apay, manu aya ti… Ditay maliklikan ti agpanunot iti sabali no kastoyen ti mapagsasaritaan.

Iti napalabas nga uppat a dekada a kaadda tayo iti siudad ti saleng, inararapaap tayo. Sinirsirmata tayo ti anian a nagngayed ti agindeg iti daytoy a siudad ta nagpintas ti klimana.

No iti bigbigat, malang-ab mo ti agat-bulong ti saleng wenno tay kunada nga agat pine needle ta angin na a buyogan ti pul-oy a nasalemsem.

Isu a tinagtagainep ko a no maaddaanak iti pamilia, kayat ko a ditoy ti pangbangonak iti umok ti ayan-ayat mi iti agbalin a kasimpungalak.

Malagip ko la unay idi adda pay laeng ti pasdek ti nagtrabahuak a radio station, sangsangwen mi laeng ti uluanan ti Burnham Park.

Nakunak iti nakem ko. Kayat ko a no addan ton bunga ti arasaas mi tunggal parbangon iti agbalin a kapisi ti pusok, ditan ti pagayayaman da ta adayo iti polyosion.

Ta manmanu pay laeng idi ti jeep ken malagipko pay tay kunada nga auto-calesa wenno jeep a walo laeng ti pasaheros na agraman driver.

Nagimnas a lagipen kayong dagidi a panawen a makapasalibukag ti salemsem, idi man panaginnagaw ti lawag ken sipnget wenno agbannawag a kagiddan ti inka panag-jogging.

Adu ti agkakangayed a paset ti napalabas nga intay malagip no intay met maimtanagan ti agdaman a kasasaad ti siudad a no sadino ket dagiti ir-iran a puon ti saleng ket masukatanen iti uppat wenno sangapulo nga asideg a maipasdek.

Kas man la masudak ti barukong tayo no intay maimatangan pannakapukan dagiti mangmangted kinangayed ti nakaparsuaan.

Ket ita, adda manen pasaway a kailian. No iti kallabes ket panagpukan kadagiti pine trees wenno puon ti saleng, ita panagburak met iti batu iti maysa a lugar ti naireklamo.

Saan laeng a gapu iti pannakadadael iti natural a buya ngem ketdi, perhuisio pay kadagiti asideg a residente ta malaksid ti pannakadayyeg dagiti babbalay da, adda pay dagiti maburak ti sarming ti tawa ti balay da gapu iti agparsiak a babassit a batu.

Bunga daytoy ti makuna a panag-quarry nga uray pay kukuam, uray pay dagam dayta no awan makuna a quarrying permit kabsat ket iparit ti linteg.

Kangrunaan ti amin, madadael ti makuna a natural beauty ti lugar ken dagiti rock formation. Panunotem a saan laeng a ti nakaparsua-an ti madadael ngem ketdi, makaperhuisio pay kadagiti kaarrubam.