Hay naku aya, biag a kaskasla takiag, Part 2

June 30, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Sakbay man ti amin, kabarangayan, kailian kakayong me ida, adtoy man ti maysa a pagraray-awan tayo. Iti maysa nga aldaw iti klase ni Maestra Sofia Cayabcab, nangted iti exams kadagiti adalanna, ket.

Gustilito: Hoy, Angkuan, apay nga agkopkopia ka kaniak?Kayatmo ta ipulongka ken Ma’am Sofia?

Angkuan: Saanka nga agpabasol iti kasta, a. Adda kadi pammaneknekmo nga agsaksakarak kenka?

Gustilito: Ket no naglawag! Kitaem, ne…agpadatan iti sungbat.

Angkuan: Aniakan sa Gustilito. Natural, ah, ket no agpapada met amin a question ni Maestra Sofia.

Di wowww, hahahaa, sirib ti tukling a balo. Husto met ni Angkuan, saan aya kaarruba?

Idi napalabas nga isyu tayo kakailian, nangruna kadakayo a pada a mannalon ket intay natalantan ti maipapan iti panagsubli tayo koman iti kannawidan wenno nariingan tayo a wagas ti panagtalon. Ta adu ti itdenna kadatayo saan laeng a pannakaipaay iti natalged a taraon a maidasar iti lamisaan ti pamilia ngem ketdi, mataraonan met ti daga ken masalakniban ti kinangayed ti nakaparsuaan a parabor kadatayo ti Namarsua. No kastoy man ti paspasaren tayo ita ket basol tayo met laeng ta naranggas tayo la unay kadagiti naited kadatayo a parabor kas koma kadagiti kabakiran tayo, inuram ken pinuted tayo amin a kaykayo ket nakalbo. No kitaen tayo ti istatistika, mano laengen a porsiento ti nabatbati a kabakiran tayo ta aramid dayta dagiti naranggas, naulpit a kaingeros ken loggers a ti laeng bukod da a pakaseknan ti pinanunotda. Naimbag koma ngarud no ammoda ti agitugkel, saan met ngarud piman…

Makaluksaw tayo kakayong ta saan a kastoy ita ti sirmata tayo iti nakaparsuaan. Koma, mas pinangayed tayo pay tapno makaay-ayo a pagnaedan ta karbengan tayo dayta. Ngem paunayen aya ta adda dagiti agtuturay wenno nabotosan kas kada naapointaran nga opisyal ti gobierno a mangkita koma iti daytoy ngem ania ti inaramidna? Isu a napukaw ti tagtagainep tayo para iti kinangayed koma ti nakaparsuaan saan laeng a para kadatayo ngem ketdi para iti sumarsaruno a kaputotan tayo.

Kunada, maka-Dios, makatao, maka-kalikasan… sus maria kusina aya, adu ti kasta a kandidato, inton nakatugawdan, awanen. Immaweren tay karkarida…koma, maysa nga ipaganetget ita ti agdama a gobierno ket ti pannakaisubli ti kinangayed ti nakaparsuaan babaen iti programa a re-greening, panagmula iti kaykayo tapno malapdan ti panagabbat dagiti ubbog ken karayan nga isu pagtaudan ti naan-anay a supply ti danum. Masalakniban dagiti kabakiran ken kabambantayan tapno maliklikan ti panagreggaay ken flash flood nangruna ket panawen manen ti matotodo. Ti rigatna ngamin kadatayo satay la ammo ti aggunay no adda ditan wenno nalpasen ti didigra, ket ti dakesna agpipinnabasol tayon.

No husto ti malagipko, idi, saantayo nga agim-import it bagas ngem ketdi datayo ti ag-export ngem ita, datayon ti aggatgatang iti bagas iti sabali a nasyon. Ngem sabagay, kuna diay maysa a gayyem tayo, umdas ti apit tayo ngem ketdi, igagarada pay la ti gumatang ta isu pay diay maibulsa kano, sus maria kusina, sinalbag a biag. Ngem back to main topic kakayong mi ida, tagatagainepmi a maisubli koma ti organiko a wagas ti panagtalon ta no saan tayo nga aramiden daytoy, dumteng ti aldaw a kasla desierton ti kataltalonan tayo, bimmaton wenno kasla masementon gapu iti awan sardayna a panagaramat kadagiti in-organic fertilizer. Awan ton agtubo a ruot kadagiti taltalon tayo. Maysa pay a gapuna no apay a dida basta mayimplemtar ti organic farming kas sagudayen ti RA 10068 wenno Organic Law of the Philippines? Dayta ti isaruno tayo a talantanen Kayong Angkuan iti sumaruno nga isyu. Ala kastan ta kumape tayo man pay.

Ala ngaruden, kasta pay kakayong, babayoo, tsup tsup muahmuah.