HIV cases sa Cordillera, patuloy na tumataas

LUNGSOD NG BAGUIO – Patuloy na tumataas ang bilang ng mga naitatalang kaso ng Human Immunodeficiency Virus (HIV) sa Cordillera.
Ito ay ayon sa tala ng Department of Health mula Enero hanggang Nobyembre 2017.
Ayon kay Cherrie Caluza, STI HIV/AIDS prevention and control program coordinator, tumataas pa rin ang bilang ng mga kaso ng HIV sa mga lalawigan ng Cordillera na Abra, Apayao, Benguet, Ifugao, Kalinga, at Mountain Province, at maging sa lungsod ng Baguio.
“Makikita talaga natin na pataas talaga ang trend ng HIV cases, hindi naman dahil madami talagang nagkakalat ng HIV/AIDS. Pwedeng dalawang face siya, either talagang madami na yung nada-diagnosed or madami na tayong capable na health facilities and health workers para mag-test sa population natin; either gumaganda yung health system natin to screen the population or talagang hindi natin nakokontrol yung HIV/AIDS.” Dagdag pa niya na maraming ginagawang programa para mapalaganap ang HIV awareness sa buong Cordillera.
Tumaas hanggang 2.10 percent ang prevalence ng HIV sa rehiyon. Mula Enero 2017 hanggang Nobyembre 2017 ay may naitalang 91 kaso sa Cordillera.
May kabuuang 389 kaso ng HIV sa Cordillera mula pa noong 1984 hanggang Nobyembre 2017.
Tumaas din ang bilang ng mga newly diagnosed HIV cases sa buong bansa na umabot na sa 31 cases per day na naitatala ng DOH kumpara sa 26 cases per day noong 2016.
Hinihikayat din ng DOH na laging gumamit ng condom sa pakikipagtalik at iwasan ang paggamit ng droga para maiwasan ang sakit na HIV. Ugaliin ding magpa-test sa mga ospital o malalapit na health units.
Ilang mga HIV Testing Centers na ang matatagpuan sa buong Cordillera. Mayroon na ring HIV treatment hubs na matatagpuan sa Baguio City (Baguio General Hospital & Medical Center) at sa mga karatig lalawigan kabilang ang La Union (Ilocos Training Regional Medical Center) at Tuguegarao (Cagayan Valley Medical Center). Nakahanda rin ang Regional HIV/AIDS Support Group ng DOH. ALLAN LEMUEL C. SUNGA, UB Intern

Latest News

Amianan Balita Ngayon