IGOROT STONE KINGDOM SA BAGUIO CITY PINASARA

November 12, 2022 Headlines

BAGUIO CITY — Ipinasara ng city government ang sikat na man-made tourist attraction na Igorot Stone Kingdom sa pamamagitan ng closure order na inisyu ni Mayor Benjamin Magalong noong Nobyembre 8
dahil sa mga isyu sa permit at kaligtasan. Sinabi ni Magalong na ang establisyimento ay tumatakbo nang walang business permit habang ang mga istrukturang bato sa loob ay hindi sakop ng building permit kung saan pinag-uusapan ang structural integrity ng mga constructions.

Aniya, nauna nang naabisuhan ang may-ari ng mga paglabag sa permit at pinayuhan na sumunod sa mga
kinakailangan ngunit nabigo ito. Sa halip, ang pamunuan ay nagsumikap na magtayo ng mas maraming istruktura laban sa payo ng pamahalaang lungsod at patuloy na sumalungat sa mga utos ng cease and desist na nagudyok sa City Buildings and Architecture Office na magsampa ng kasong kriminal para sa paglabag sa National Building Code noong Nob. 7, 2022.

Sinabi ni Magalong na kailangang isara ito ng lungsod bilang pag-iingat sa kaligtasan dahil posibleng
mapanganib ito dahil sa kakulangan ng sertipiko na tumitiyak sa kaligtasan ng mga istruktura. “We have to be proactive. We can’t wait for something bad to happen bago tayo kumilos,” pahayag ni Magalong. Batay sa isinasagawang Climate Risk and Vulnerability Assessment (CRVA) para sa Baguio City na isinasagawa ng Asian Development Bank at ng City Disaster Risk Reduction and Management Office (CDRRMO), napag-alaman na ang istraktura ay nasa “very high landslide exposure. ”

Dagdag pa ni Magalong, idineklara na rin ng Mines and Geo-Sciences Bureau ng Department of Environment and Natural Resources (MGBDENR) na “prone to erosion” ang lugar. Ang Stone Kingdom ay
sinimulang itayo nang pauntiunti sa 6,000 metro kuwadrado na lugar na pag-aari ni Contractor Pio Velasco.

Zaldy Comanda/ABN