ILI TI ILOCOS NORTE RINUGIANNA ITI 4-ALDAW A PANAGUBRA TAPNO MAKAINUT ITI KORIENTE

Headlines

ILOCOS NORTE – Rinugian dagiti empleado ti municipal a gobierno ti Piddig sadiay Ilocos Norte iti uppat nga aldaw a panagubra iti makalawas idi Lunes, Hunio 20 kas panangsalimetmet iti gasolina ken koriente, ken dadduma pay.

Imbaga ni Mayor Eduardo “Eddie” Guillen iti maysa nga interbiu iti telepono idi Miyerkoles nga iti napaababa a panagubra ti makalawas ket panggep a mapasayaat iti panagtrabaho dagiti empleado nga itandudo iti natibtibker a pamilia babaen iti panangted kadakuada iti ad-adu a panawen tapno makalangenda iti pagtaengan.

“Iti uppat nga aldaw a panagubra ket panangpadpadaan met iti maysa a rumrumsua a krisis iti taraon,” kuna ni Guillen nga innayonna pay nga kada Biernes ket maisangrat para iti “Food Production Day” para kadagiti empleado tapno maipasdek ti bukodda nga minuyongan ti taraon.

Imbaga pay ni Guillen nga mangiwaras met iti munisipio iti bukbukel ti nateng para kadagiti amin a barangay tapno adda bukodda a minuyongan ti komunidad bayat nga amin a di mamul-mulaan a dagdaga iti Poblacion ket mamulaan kadagiti agbungbunga a kayo ken natnateng.

Di karaman manipud iti bilin ti Mayor ket dagiti frontline service workers kas dagiti agtrabtrabaho iti healthcare, janitorial services, ken radio communication a naidawat nga agubra iti inaldaw.

Ita, iti umuna a napaababa a panagtrabaho iti kada lawas a gakat iti ili ti Piddig ket mangrugi 7:30 a.m. agingga 6 p.m. “Daytoy ket di nakedngan tapno kitaen no agkurri daytoy ken mabalin a tuladen dagiti sabali a local government units,” kuna ni Guillen.

Sakbay daytoy, nangiruar iti Civil Service Commission iti interim guidelines nga mangted autoridad kadagiti ahensia ti gobierno a mangipatungpal iti alternatibo nga urnos ti panagtrabaho maibasar kadagiti mandato ken trabaho iti ahensia, sungbatan dagiti panagkasapulan iti serbisio publiko iti kangitingitan iti pandemia a nanglimita ti panaggaraw dagiti trabahador ti gobierno.

Panggep ti CSC nga ipasdek iti nalap-it nga urnos ti panagtrabaho kas paset iti intero a pagilian a pamusmusan iti panagbaliw manipud iti maysa a kasasaad ti public health emergency iti baro a normal.

Agserbi daytoy kas maysa a pamusmusan a panglapped tapno saluadan iti salun-at, kinatalged, ken pagimbagan dagiti opisial ken empleado bayat a maipasigurado iti agtultuloy nga operasion ken episiente a pangited kadagiti serbisio publiko ti gobierno.

(LA-PNA Ilocos/PMCJr.-ABN)