Ilocos Norte gumatang ti 23 a trak para ti basura

September 22, 2019 Headlines

SIUDAD TI LAOAG – Gumatang ti lokal a gobierno ti Ilocos Norte ti 23 a trak a pagkolekta ti basura tapno naan anay ti pannakasalluad ti aglawlaw babaen ti umiso a panangiwanwan ti basura.
Umabot ti P65,5656,092.00 ti nailatang a pondo nga usaren ti Ilocos Norte nga panggatang ti trak a kompaktor ti basura.
Aggapu manipud iti 20 a porsiento nga “development fund” a saan nga nagastos ti probinsia itay napan a tawen ti nailatang a panggatang ti trak. Inlawlawag ni Gobernador Mathew Marcos Manotoc a napateg iti pannakagatang ti trak tapno adda mausar a pagala ken pagipan kadagiti basura iti umno a pagbasuraan.
Segun kenkuana, maiwaras dagitoy a trak a pagkolekta ti basura kadagiti 21 nga ili ken dua a siudad iti probinsia. Babaen kadagitoy a trak, mamati ti gobernador nga agbalin a naannayas ti pannaka-ala amin a basura dagiti umili, ken maisigurado ti pannakamentinar ti nadalus nga aglawlaw iti probinsia.
Kiniddaw pay ti gobernador ti pannakitinnulong dagiti umili para iti pannakatagiben ti napintas nga aglawlaw ti probinsia.
Kinuna ti gobernador a magatang dagiti 23 a trak ti basura sakbay nga agtapos ti tawen 2019. Malaksid kadagiti trak a kompaktor ti basura, gumatang pay ti probinsia ti “odor insect/ killer solutions” ken dagiti ramit a maikapet kadagiti ti tubo ti danum iti pampubliko a luglugar ken pagadalan tapno maisigurado ti kinadalus ti danum nga inumen dagiti umili.
Maiwaras met dagiti “odor insect/killer solutions” kadagiti amin nga ili ken siudad ti probinsia tapno saan nga agangot dagiti basura. Impasigurado pay ti gobernador nga agtultuloy ti suporta ken tulong ti gobierno ti Ilocos Norte kadagiti amin nga ili ken siudad ti probinsia kangrunaan na kadagiti awanan pay iti bukod a sanitary landfill tapno maaddaanen dagitoy kas panangtungpal ti nainget a bilin ni Sekretario Roy Cimatu iti Department of Environment and Natural Resources (DENR).
 
FGL-PIA1/PMCJr.-ABN