ILOCOS REGION NAKAREHISTRO TI 2.1K A KOOPERATIBA MANIPUD 2023: CDA

December 8, 2024 Headlines

MALASIQUI, Pangasinan

Agdagup iti 2,129 a kooperatiba iti Ilocos Region ti nakarehistro iti Cooperative Development Authority (CDA)
agingga iti Nobiembre 30 ita a tawen, ken kaaduan kadagitoy ket adda iti Pangasinan. Kinuna ni CDA Ilocos Region assistant director Edilberto Unson, idi Martes nga adda 1,112 a rehistrado a kooperatiba iti Pangasinan. Simmaruno dagiti adda iti Ilocos Norte iti 383 idinto nga adda 328 iti La Union ken 306 iti Ilocos Sur. Nupay kasta, kinuna ni Unson a 1,272 laeng kadagiti rehistrado a kooperatiba iti rehion ti agtigtignay.

Iti laksid daytoy, kinunana, adda iti agdama a 12 a kooperatiba nga adda iti sidong ti bilionario a kasasaad. Idi 2023, 20 a micro enterprises ti nagturpos ken nagbalin a small enterprises bayat nga uppat ti na-upgrade iti medium enterprises; tallo manipud small to medium; ken dua a medium ti nagbalin a large enterprises. Kinuna ni Unson nga adda 64 a kooperatiba a nagrehistro ita a tawen, kaaduan kadagitoy ket adda iti sektor ti agrikultura, sarunuen dagiti adda iti sektor ti consumer, transport, ken agrarian. Adda sumagmamano a programa ti CDA para kadagiti kooperatiba kas iti Koop Kapatid, nga addaan iti konsepto a big brother, small-brother. “Dagiti dadakkel a coop ket tumulong kadagiti babassit a coop babaen ti teknikal, pinansial, ken panangisuro, ken dadduma pay,” kinuna ni Unson.

Kinunana a 33 a micro ken small cooperatives ti naikkan iti financial assistance. Nupay kasta, kinuna ni Unson a ti compliance rate kadagiti kooperatiba ti rehion ket adda laeng iti 57.15 porsiento, gapuna nga ikagkagumaan ti CDA a pasayaaten daytoy babaen kadagiti nadumaduma a programa kas iti pannakaisayangkat ti compliance caravan, pannakaipaay ti legal counselling, linkage ken networking, capacity building, ken advocacy network, ken dadduma pay. “Panggepmi nga amin a kooperatiba ket agbalin a responsable a kooperatiba,” kinunana.

Kabayatanna, kinuna ni CDA Ilocos Region senior cooperative development specialist Van Ian Enriquez nga ikkanda ti libre a panagsanay kadagiti kameng ti micro ken small cooperatives. “Ti Coop ket maysa a social vehicle kadagiti purok a mabalin a mangyeg iti panagbalbaliw ken sosial a pagimbagan a panagduras,” kinunana. Innayonna a dagiti isyu a mainaig iti liderato ken management ti gagangay a makagapu iti pannakapaay dagiti kooperatiba a mangtungpal kadagiti pagannurotan, iti kasta mangipapaay ti CDA iti panagsanay ken dadduma pay a wagas.

(HA-PNA Ilocos/PMCJr.-ABN)