Impeachment manen, people power kadi manen?

March 25, 2017 Opinion Sirmata ken Tagtagainep ni Mang Gusting

Naimbag nga oras tayo amin kakailian, Kayong Angkuan ken Ikit Juana, mag-an wenno kumusta metten ti biag tayo, ania met ti madamag kadagiti madaydayaw a luglugartayo? Dagita agkikinnuto dita siruk ti logo iti igid ti baybay a mangur-uray kadagiti napan nagsigay wenno nagdaklis. Sus, no awan maaramidyo, inkay la koman agpidut iti kumukusay a kunada wenno bangkalanang ta adda alseman yo. Ammomi a pambar yo laeng ti agkikinnuto ngem ti mangtsistsimis iti biag ti kaarrubayo ti ar-aramidenyo! Madi ti kasta, saanyo a bibiangan ti biag ti sabali nangruna no diyo kayat a kasta met ti aramidenda kadakayo. Golden rule koma, a saanmo nga aramiden iti padam a tao ti banag a dimo met kayat a maaramid kenka. Opssssss bimmanat manen ni Lakay Gusting ket karugrugina kunayo ngata ngem dayta ti pudno saan kadi… o, di ketdin Manang Ansing?
Adda ngamin kasta nga ammomi, awan la’t sabali nga ammo na no di mangtsismis iti biag ti kaaarubana naimbag koma no pudno met ngarud, saan met ta pasig a parbo ti nagatel a dilana. Ket ammoyo ti napasamak? Sus Kayong Angkuan, kasdiay gayam ti aggubal nga agpada a bugbugyan, hahahaha. Sus, di mo man la naawatanen ti kunak a bugbugyan…dandani mamultit, in short masikog. Hahaha, awan mo a talaga Mang Andres, nakapsot ti pick up ta palayagmo este lapayagmo. Ti imasna a pagdaksan Kayong, naipasubo tayo ta kellaat met lattan nga aganak wenno agpasikal dagiti dua. Ania ngay, intaray min a ken kapitan dagiti dua a masikog ket ti imasna, apowwww, dakami metten ken kapitan ti napagbiddutanda nga assawa dagiti masikog ket sabali payen ti atap dagiti doktor ta agasem met arigna karissabong dagiti masikog idinto ta agpada kamin a dual citizen este senyor ken kapitan. Dayta ti maal-ala ti sobra a pannakibiang iti biag ti akim-biag, uray man ket agsikog amin a bakrang tay kaarrubam, saanmo a bibiangan!

Alla ka, uray la manglapayagen ti rungiit ni pareng Danny iti inistoryata ngem, panawan tayo man pay la dayta panaggubal ti dua a tamboran este masikog. Daytoy man damag iti napalabas maipapan iti pannakaipila ti impeachment complaint kontra ken President Digong. Sus maria kusina. Ania man daytan a nagtotoon iti utekyo, impeachment manen. People Power kadi manen? Sus ina, dikay la maaum-uma, ania ti nagan-ganabtayo kalpasan dagiti naglabas a people power kas kada impeachment, adda kadi? Nagbaliw kadi ti taray ti biagmo, Kayong Angkuan, Ikit Juana? Awan, saan kadi? Ad-adda ketdi a nagbalin a marigrigat dagiti nakurapay wenno mamgurkuranges ket bimmaknang met latta dagiti baknuang este baknang. Ta kasano, nagadu nga anomalya a rimrimuar nga agpapan shabu lab iti uneg ti kadakkelan a pagbaludan iti pagilian malaksid nga idiay a mailaklako wenno aggapu iti supply, idiay ti maatap nga ayan ti laboratoryo! Ay ina!

Ngem, speaking of shabu iti pagbaludan, kasla nakaluban man metten dayta nga isyu manipu idi natiliw ni shabu queen este ti maysa a senadora gapu iti maatap a pannakainaigna iti shabu trade iti nasao a pagbaludan. Ania kadin nga agpayso ti nagbanagan dayta? Ta sabali man nga isyu dagiti rumrumuar porke pa-impeach da ni President Digong gapu iti kampanya daytoy kontra droga. Porke extra-judicial killing kano ta adda dagiti maatap a maiwlaang a personalidad ket adda kano pannakainagna iti droga. Napapatay a di nagna iti husto a proseso. Ngem ti makunami, no kakasta a drug personalities wenno maatap nga adda iti likudan ti pannakiwaras ti droga ti matay nagadu a ngakngakda ngem no maysa a biktima ti maatap a dupang wenno drug addict wenno polis pay ketdi ti natay gapu iti panangkemmegda koma kadagitoy a drug pusher, agul-ulimekda met, sus Maria kusina a kunada, ano ba talaga kuyaaa? Batu-bato sa langit, tamaan, bukol!

Oppssss, dakesen, Kayong Angkuan, kakadua a senyor citizens ditoy sango ti store ni ikit Juana, naimasak manen ti nagsodsod iti halu-halo este nagistorya. Surotennak to man ngatan iti binalsig a pagsungrod ni Sofing. Nalipatak manen tay pagatgatangna a manteka ken itlog a pamigatan mi…adu pay koma ti innak istoryaen ngem ala, babayooo, tsuptsup muahmuahhh.