Ina natay, 2 ubing nadangran iti nagaburan a balay iti Baguio

May 28, 2017 Headlines

SIUDAD TI BAGUIO – Pimmusay ti maysa nga ina ken dua pay nga ubbing ti nadangran kalpasan a nagaburan ti balay dagitoy gapu iti nargaay a riprap iti Barangay Kias idi malem ti Mierkoles (Mayo 24).
Iti reportna iti Office of the Civil Defense (OCD) Cordillera, kinuna ni Police Chief Inspector Jethro Moog, head ti City Public Safety Battalion (CPSC)-Baguio City Police Office (BCPO), napasamak ti insidente 3:45 ti malem sadiay Block 34, Lot 14, Pinesville Subdivision.
Nabigbig ti pimmusay a ni Jemma Mendoza, 39, narekober daytoy dagiti barangay officials ken dagus a naitaray iti Baguio General Hospital and Medical Center (BGHMC) nu sadino a naideklara daytoy a dead on arrival.
Nadangran met ti maysa anyos nga anak ni Jemma a ni Nathaniel de Jesus ken kasinsin daytoy a ni Lenary de Jesus, 11.
Kinuna ni Moog a napandagan ni Jemma ti maysa a concrete post idi nargaay ti asideg a riprap ket nagaburan iti bato ken daga ti balayda.
Segun kenni Jason Wanna, residente iti lugar ken maysa kadagiti immuna a nagresponde, adda nangngegda a kasla naggurruod gapu iti tudo ket nakitada lattan a nagaburan ti balay ti biktima. PNA / ABN