Isyu sa inapurang e-bingo, sinisiyasat muli

June 25, 2017 Metro BLISTT

Tinutugunan ngayon ng pamahalaang lokal ang mga pagdududa ng mga umaalma sa pagsusugal bunsod ng tila minadaling pag-apruba sa mga electronic bingo gaming sites, na dahilan upang tagurian ang lungsod bilang “electronic and traditional bingo capital”.
Ang konseho ng lungsod, na noong una ay sumang-ayon sa aplikasyon ng mga e-bingo, kamakailan ay bumuo ng komite sa pangunguna ni Councilor Elaine Sembrano upang makuha ang pahintulot ng mga residente.
Ito ay matapos na pangunahan ni Councilor Mylen Yaranon ang pagtutol sa mga naunang pag-apruba sa e-bingo sites. “You only considered one side of the coin in your decision,” aniya sa 14 miyembro ng konseho na tumango sa mga aplikasyon ng e-bingo.
Ayon kay Councilor Sembrano, napag-alaman na walang isinagawang public consultation nang inaprubahan ang mga e-bingo.
Usap-usapan din ang diumano ay “padulas” para sa city council kaugnay ng pag-apruba sa mga gaming site.
Ang mga anti-gambling groups na kinabibilangan ni Catholic Vicar Carlito Cenzon na nangunguna sa sektor ng edukasyon, relihiyon, kababaihan at kabataan sa lungsod ay maigting sa pagtanggi sa anumang klase ng pagsusugal, legal man o hindi.
Sa city council session noong Hunyo 19 ay dumagsa ang anti-gambling advocates upang tuligsain ang pag-apruba ng konseho sa naturang gaming sites. Hiniling ni Yaranon ang pagsusuri sa mga naunang city council approvals kaugnay nito.
Tinuligsa rin ni Yaranon ang pag-apruba sa hiling ng Bingo Palace Corporation na naiulat na pag-aari ng isang Jimmy Ong, para magpatakbo ng bagong e-bingo outlet sa Albergo Hotel, ilang metro lamang mula sa The Mansion, kung saan iaalok ang electronic at traditional games gaya rin ng hiling ng Highland Gaming Corporation na ipagpatuloy na patakbuhin ang traditional bingo games sa upper basement ng SM City Baguio at Baguio Center Mall.
Ayon kay Yaranon, “the request of e-bingo proponents were submitted on May 26 (a Friday) and was taken up in other matters on May 29, (council session on a Monday). Other matters are only allowed if it is urgent and important.”
Si Councilor Peter Fianza lamang ang nagbigay ng objection habang si Councilor Robert Ortega ay naka-leave, kaya hindi kasali ang mga ito sa unanimous decision, maging si Yaranon na wala rin dahil sa libing ng kanyang ama na si dating Mayor Braulio Yaranon noong Mayo 29.
Giit ni Yaranon, “financial problems arise to an addicted gambler because of indebtedness to many loan sharks of financial institutions. Personal and real properties are lost because of gambling. This is one reason of bankruptcy and broken families.”
Ang mga sites ng e-bingo games sa lungsod ay malapit sa mga simbahan, paaralan at market gaya ng St. Joseph Church, Little Flower Retreat House, Dr. Jose P. Rizal Elementary School, at Pacdal Satellite Market, na pawang nasa loob ng 300 metro mula sa Albergo Hotel.
Ang Our Lady of Atonement Cathedral ay nasa 300 metro din mula sa SM Baguio.
Ang Baguio Public Market, Saint Louis University at University of Baguio ay pawang nasa loob ng 300 metro mula sa Baguio Center Mall.
Nauna nang sinabi ng PAGCOR sa mga opisyal ng lungsod na hinihintay lamang nila ang pagtutol mula sa mga opisyal kaugnay ng electronic bingo outlets sa lungsod, na kinabibilangan ng gaming site sa Marcos Highway, upang bawiin ng ahensya ang permiso na ibinigay sa operasyon ng mga naturang gambling outlets. ACE ALEGRE / ABN