Kabommm, bomba!
Yahooo, yahoooo! Naimbag nga oras kadatayo amin kakailian. Addakam manen nga umay maki-abrasa kadakayo babaen iti ABN. Ania, Kayong Angkuan, kumusta kayo metten ken Ikit Juana? Ania met ti madamagen kadakayo? Sapay la koma ta napia kay latta a danunen ti isyu tayo ita a lawas. Ngem no dakami met ti kas yo damagen. Kaasi ti Apo a Namarsua adtoy nga umang-anges pay laeng nga uray kastoy la’t adda a rigat ti biag a kunada.
Hay naku, Kailianmi ida, nagduduma manen ti mapaspasamak ditoy ingungoten tayo a pagilian ngem, aguray ka man… Pinosgan gayamen ni President Digong ti sigud a kaduana wenno running mate iti napalabas a presidential elections a ni Allan Cayetano a nagtaray kas bise presidente daytoy kas kabarbaro a Foreign Secretary. Husto met laeng ti nangngegko a damag, Kayong Angkuan?
Sabagay, uray asino ditan ti dutokanda, daytanto met laeng kaykayatda ti madursurot. Ken awan met laeng ti kasla makita a pagdur-asan ti panagbiag ni Pinoy wenno biag tayo Kayong Angkuan.
Ngem daytoy ti kaudian a damag a makapakintayeg, Kayong Angkuan. No sadino ket isu ti kaadda ti bomba a nagbettak iti maysa a paset ti Metro Manila. Opssss, apay Pare Jun a sabali isem mo dita. Seguro, sabali a bomba ti adda dita utekmo ania, hahaha, malagip dagiti nagadu a nakabomba idi tungga rabii idiay Ermita ania, hahahaha. Wen, Kayong Angkuan, ania ngata ti ipasimudaag ti kaadda dagitoy a riribuk. Kayatda kadi a riribuken ti administrasyon ni President Digong? Hay naku, no ania la ditan ti mapaspasamak. Nakabutbuteng ngamin ti dua nga insidente a napasamak idiay Quiapo iti napalabas a lawas.
Bayat a maiwaywayat ti imbistigasion maipapan iti nasao nga insidente, nakiddaw kadagiti umili nga agtalinaed nga alerto ken mangi-report kadagiti awtoridad kadagiti nakadidillaw nga agtibidad wenno tigtignay, segun iti spokesperson ti Malacaniang.
Nainayon pay a nakiddaw kadagiti umili a dida koma agipadpadamag kadagiti saan a husto a damag tapno maliklikan ti panna-alarma ken panagbuteng. Wen, Kailian, liklikan tayo koma ti mangipadpadamag kadagiti makuna a tsismis a damag. Ngem, ania ngata a talaga ti rason dagitoy nagaramid iti kastoy idiay Metro Manila?
Malagip a dua katao ti naipadamag a natay ken adda dagiti nadangran a pakairamanan ti dua a polis, Kayong Angkuan. Napasamak daytoy iti maysa a paset ti Quiapo nga asideg ti Mosque. No panunoten maysa daytoy a kina-terorista. Ngem, agingga ita ket awan met ti kasla resulta ti imbistigasyon, didansa pay la ammo no asino ti adda iti likudan daytoy a kabommm este panagbettak ti bomba.
Kabayatanna, iti sabali a banda, kadagiti napalabas nga al-aldaw, adda met dagiti napasamak a panagbomba iti sabali a pagilian a maipapan a gapuanan dagiti terorista. Ngem manmano dagiti mangaklon nga isuda ti akin-aramid wenno adda iti likudan dagitoy a panagbomba. Ti nakas-ang iti amin, adu dagiti mairaman nga inosente.
Kas koma kadagiti dua a polis a mangiwaywayat iti imbistigasyon iti napasamak iti insidente. Daydiay nairaman da a dina oras. Adu a perhuisio no saan a panagrisgo ti biag, pannakadadael ti sanikua. Sus maria kusina kayo, awan la’t nasayaat nga inkay maaramidan.
Ala ket ania ngay, kas kunada, tangay saantayo a nagkakapet, agsisina tayo man ngaruden. Narigaten, naimasan tayo manen ti nagi-inistorya amangan no inton madamdama, adda man a sumungaden ni Sofing a nakaiggem iti binalsig. Hahaa, ala babayoo, tsuptsup muahmuah.
Happy Mother's Day
May 14, 2017