Naimbag a malem, agsapa, wenno rabii yo amin kakaarruba, gagayyem ken kaginginnura. Sapay la koma ta napia kay latta a kanayon nangruna kadagiti sukimi iti ABN readers.
Panawen manen ti nepnep kailian, agannad tayo koma laeng.B ayat a sursuraten mi daytoy Kakayong, adda pay laeng iti masakupan ti pagilian ti bagyo Ineng. Nupay saan a dimmalapos ditoy siudad ti saleng ti gupit na, napasaran met ti todo nga awan sarday na, epekto a kuna da ti hanging habagat.
Ala, pagyamanan laengen ta kastoy la’t napasaran kakailian, kakayong ngem kadagiti kakailian iti dippaarna’t umamianan a paset ti pagilian, napasaran da manen ti angin ken todo.
Kadagiti kakastoy a panawen wenno bulbulan, intay mapasarakan ti makuna a rainy season, tiempo ti panagtatalon kadagiti lugar a mangnamnama laeng ti parabor ti langit a todo ngem kadagiti adda irigasion da, pasaray mamitlo da pay nga agtalon kakailian.
Kadagitoy a bulbulan, gagangay laengen a pasaren ti nagduduma a kalamidad, layos, napigsa a bagyo, flash flood ken panagreggaay ti bantay ken landslide kadagiti kalsada. Dagitoy a kalamidad ti saan a malapdan, saan a mapakpakadaan.
Natural calamity a kunada, ngem adda met dagitay kalamidad a maibilang a dakkel unay ti pakainaigan tayo wenno panagbaybay-a, panagliway nangruna iti panagraira ti dengue iti nagduduma a lugar a no sadino ket naideklara payen nga state of calamity dagitoy a lugar gapu’t kaadu ti biktima iti kagat ti lamok.
Ania ti kangrunaan a rason? Gapu kanu iti kinarugit ti aglawlaw nangruna kadagiti kanal ken dadduma pay a pakaurnongan ti danum a no sadino ket ditoy nga agitlog dagiti lamok a mangted dengue.
Ania ngarud ti makuna tayo iti daytoy a kita ti kalamidad? Narural calamity pay ngata wenno gapu’t kinaliway tayo? Dagiti dadduma pay a kalamidad, aklonen tayo man wenno saan ket adda latta makuna a partisipasion tayo.
Adda ti makuna a paset tayo. Apay kunayo ngata? Gapu met laeng ti kinaranggas tayo iti nakaparsuaan. Imbes a nagpintas ti sirmata ken tagtagainep tayo iti lugar tayo nga intay pangbangonan wenno nangbangonan tayo iti umok ni ayat a kunada, napukaw.
Nakeltay dayta a sirmata ken tagtagainep gapu kinaranggas a mismo ti tao iti kinangayed ti nakaparsuaan a parabor ti Apo. Gapu’t kinaranggas tayo, nagpukawen ti sirmata ken arapaap tayo a kinanged ket dagiti sumarsaruno a henerasion, asi dan to payen ta asuk wenno narugiten nga angin ti inda angsen.
Koma ngarud kakayong, saan pay a naladaw ti amin no ita ket intay agtignayen, kinangayed ti aglawlaw intay koma pasublien. Agmula tayo kadagiti kaykayo a mangpangayed, nakaparsuaan nga intay patpatgen.
Ngarud, agtitinnulong tayo koma, agkaykaysa tayo, sirmata ken tagtagainep tayo, intay manen pasantaken ta awan sabali a mairanud, no saan a datayo met laeng wenno sumarsaruno a sagibo tayo met laeng.
Anian Apo Gobierno, yununam koma a sanguen, pagimbagan ni Kayong angkuan, saan ket a mangwayawaya kadagiti napeklan a karasaen.
Pannakapangayed ketdi iti aglawlaw ken panagbiag ti umili, inkay asikasuen. Agtignay kayo koma itan, saanen nga itantan, ta amangan no naladaw ton ti amin.
August 27, 2019
August 27, 2019