Kalpasan ti didigra, ania ngay ti mabati?

July 16, 2017 Opinion Sirmata ken Tagtagainep ni Mang Gusting

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Kayat dakayo laeng met a kumustaen no ania metten ti mapaspasaranyo ita kadagiti ayan yo. Ania, nakatalon kayon Kayong Angkuan, adda dagiti nakasarita tayo a sumagmamano a mannalon iti paset na ti Pangasinan. Lumbes kanun dagiti bunobonda ngem awan metten ipaay ti Langit a todo, isu nga ania ngay, aguanta padanum babaen ti generator ti ar-aramidendan.

Ngem, no dakami ditoy siruk ti kasalengan, adtoy minalemen ti todona. Koma a ket kasta met dita tapno makatalon kayon, ta no dikay makatalon, sus, addanto pay ket ngata apoyentayon? Agpannuray tay to manen iti maangkat a bagas a pagkuartaan manen dagiti buwaya este kurakot a tattao. Ammoyo, Kayong, kas iti nadakamat tayo kadagiti immuna a kolum tayo ania, dakkel ti paset tayo iti global warming ken agtungpal iti climate change. Kunayo seguro, makauman dayta a topik mo Mang Gusting kunayo seguro ngem daytoy ket concern tayo laeng iti masakbayan ta no agtultuloy ti intay panangdadael kadagiti nabatbati a kabakiran tayo, no saantayo nga agtignay, kaanunto pay? Ken no saan a datayo ti aggunay, asino ti urayentayo? Koma, no adda ti dadaelentayo, tarimaanen wenno sukatantayo kas koma iti panangdadael tayo iti kabakiran, pukan ditoy pukan idiay agingga iti awanen matda a kas iti kaawanen nabati a buokmi ken Lolo Doro…maigalisen ti kuto a kunada ta awanen pagkaptanda, sus Apo Aya Kayong Angkuan.

Kalpasan daydi napasamak a bagyo a nangdalapus iti kabisayaan, adu ti nadadael. Adu ti naawanan iti pagtaengan ket, no dikam agbiddut, adu pay laeng ti saan a naipaayan iti pagtaengan. Ken, kasanu met ti makuna a kabuhayan dagiti kakabsat a nadalapus ken apektado. No labsem ti agsao, sobra-sobra dagiti naawat a donasyon manipud iti sabali a pagilian tapno maipaayan iti tulong dagiti biktima ngem—puweee, adda met rimuar a damag a dida ammo no ayan itan dagiti nasao a tulong…nagsi-nagsi pisuk sa met kadagitay bulsadan. Sus, batubato sa langit, tamaan bukol.

Kas nakunatayo, kalpasan ti didigra, ania ti sumaruno? Saan kadi a rehab wenno panangipaay iti sabali a gundaway kadagiti kailiantayo a nagbalin a biktima tapno mangrugi manen. Koma, saan laeng a pagtaengan ti rumbeng a maipaay kadakuada ngem ketdi trabaho tapno adda agtultuloy a pamataudanda iti pagbiagda. Ngem no relief lattan, awanen a, kasanun no awanen ti relief, agbiagda pay ketdin. Kas tay kunada ngaruden Kayong Angkuan, Ikit Huana, ikkam kanu maminsan iti sida wenno ikan, paramanam ngem iti maikadua, saanen nga ikan ti ited mo kenkuana ngem ketdi, banniit weno kalapna tapno isun ti mapan agkalap iti para kenkuana ta di agnanayon a mangnamnama iti maiduol kenkuana.

Wen, kailian mi ida. Nagrigat ti paspasaren tayo kalpasan ti didigra kas koma iti napasamak idi a panagyegyeg wenno ginggined idi tawen 1990s. Kasla kanibusanan idin ti lubong nangruna iti siudad ti Baguio, narekpan dagiti makuna a kangrunaan a kalasada a rumuar ken sumrek iti siudad, agibus ti supply ket iti kastoy a panawen a kalkalpas ti maysa a didigra, bagyo man, landslide, storm surge ken ania pay dita, ditoy koma ti panangipakita iti pannakipagrikna ken itutulong tayo iti kaarruba wenno padatayo a tao. Saan ketdi a pananggundaway. Imbes a tumulong, sikanto pay ti agitaray kadagiti ramramit dagiti biktima.

Alan Kayong Angkuan, kasta pay ta ne, narigaten no data met ti madalapus ti bagyo no di maurayen ni Sofing ti pinagatangna. Babayooo, tsuptsup muahmuah.