KASO TI DENGUE TI ILOCOS REGION NGIMMATO ITI 14.9%

September 7, 2024 Headlines

SIUDAD TI DAGUPAN, Pangasinan Impasigurado iti Department of Health (DOH) iti kinasagana dagiti ospital ti Ilocos Region a mangawat kadagiti pasiente ti dengue iti panangipasdek manen kadagiti fast lanes kalpasan iti 14.9% a tinawen nga ingangato dagiti kaso agingga Agosto 17, 2024. Ipakita ti datos nga agingga Agosto 17, dagiti kaso ti dengue iti rehion ket dimmanon iti 4,255, ngimmato manipud 3,702 iti pada a panawen idi 2023.

Iti maysa nga interbiu iti telepono idi Huebes, imbaga ni DOH Ilocos Region medical officer Dr. Rheuel Bobis nga nangiruar iti central office iti maysa a memorandum idi Agosto, a mangibaon kadagiti ospital ken healthcare facilities nga ipatungpal dagiti pamay-an tapno matulongan dagiti pasiente ti dengue. “Ready na po sila. Naglabas po tayo ng memo para mag-reestablish ng exclusive dengue fast lane and rooms,” kinunana. Agingga ita, addaan iti Pangasinan iti kaaduan a kaso nga 2,186.

Sinaruno ti La Union, 970; Ilocos Sur, 791; ken Ilocos Norte, 308 a kaskaso. Addan iti 17 natay ita a tawen, nababbaba ngem iti 20 iti pada a panawen idi 2023. Iti dagup, 15 ket manipud Pangasinan ken maysa manipud Ilocos Norte kasta met manipud La Union. Imbaga ni Bobis nga iti Provincial Health Offices, Municipal Health Offices ken Regional Health Units ket naikkan iti anti-vector borne diseases commodities kas iti sprayer, misting machine, ken insecticide tapno matameng iti ngumatngato a bilang dagiti kaso.

Itultuloy ti DOH nga iduron iti 4S – search and destroy mosquito-breeding sites, seek early consultation, self-protection measures, ken support spraying or fogging kadagiti lugar nga addaan clustered cases – tapno malapdan dagit kaso ti dengue. Nababbaba a kaskaso ti leptospirosis Kabayatanna, dagiti kaso ti leptospirosis iti rehion agingga Agosto 17 ita a tawen ket bimmaba iti 47.7 porsiento nga 90 manipud 172 iti pada a panawen idi napalabas a tawen. Nakairekord ti Pangasinan iti 36; La Union, 35; Ilocos Sur, 12; ken Ilocos Norte, pito.

Adda iti 11 a natay gapu iti leptospirosis ita a tawen maidaig iti 31 iti pada a panawen idi nalpas a tawen, Iti kadagupan, innem ket manipud La Union, dua iti Pangasinan kasta met iti Ilocos Sur, ken maysa iti Ilocos Norte. “Adda iti alokasion ti doxycycline kadagiti Provincial Health Offices ken Municipal Health Offices, ken maipatpatungpal dagiti information education campaign iti prevention ken proper post exposure prophylaxis,” kinuna ni Bobis.

(HA-PNA Ilocos/PMCJr.-ABN)