Katawa-tawang pagbabawal ng PDA – maliit na hakbang, malaking tulong laban sa COVID-19

Hanggang Marso 9, 2021 ay nakapagrehistro na ang Pilipinas ng 600,428 kumpirmadong mga kaso ng COVID-19 kabilang ang 12,528 na namatay. Sa nakaraang mga linggo ang bilang ng mga bagong kaso ay bumulusok sa lagpas 3,000. Sa biglang pagtaas ng bilang ng mga nahahawaan ng virus at ang pagkalat na rin ng mga panibagong variant ng COVID-19 ay naaalarma na muli ang mga awtoridad dahil tila mas malala pa at mas mabilis ang hawaan kaysa kasagsagan ng pandemya noong nakaraang taon ng mag-umpisang kumalat ang sakit.
Sa mga nakalipas na ilang buwan ay napababa na at napanatili ang mas kaunting bilang ng mga nagkakasakit kaya niluwagan na ang mga restriksiyon sa buong bansa lalo na sa Metro Manila na sentro ng hawaan dagdag pa ang naaning kumpiyansa dahil sa pagdating at pagsisimula ng pagbabakuna sa mga health frontliners at health workers.
Eksaktong isang taon na ang nakalilipas ng isailalim ang bansa sa mas mahigpit at maigting na kuwarentina at pinakamahabang panahon ng lockdown, ngunit hanggang ngayon ay hirap pa rin tayo sa pakikibaka sa sakit na tila wala nang katapusang bangungot na ito.
Sinasabing kulelat na raw ang Pilipinas sa pagtugon at pamamahala sa COVID-19 upang masugpo ito, sa kabila ng pagpupursige ng gobyerno at magpatupad ng iba-ibang pamamaraan sa pagtugon sa sakit.
Muli ay napipintong ilagay na naman ang bansa sa mas mahigpit na restriksiyon at sa katunayan ay iniutos na ang granular lockdowns sa mga lugar partikular sa Metro Manila kung saan naitala ang biglang pagtaas ng mga kaso at pinangangambahang may mga community at household transmissions – mga miyembro na ng mga pami-pamilya ang nagkakahawaan ayon sa DOH.
Tuwirang tinututulan ng mga grupo ng mga nagnenegosyo at mga opisyal ng mga ahensiya sa ekonomiya ng bansa ang pagsasailalaim sa bansa sa pinakamahigpit na restriksiyon dahil dapang-dapa na ang ekonomiya ng bansa at kung hindi pa umusad ito ay hindi na alam kung saan tayo pupulutin.
Dahil dito ay nababahala ang mga awtoridad at bilang kabilang sa mga unang tagapagpatupad ng mga batas at ordinansa na nauukol sa pandemya ay naatasan ang kapulisan na ipatupad ito at panatilihin na nasusunod ang minimum health protocols sa lahat ng lugar at panahon.
Alinsunod sa direktiba ng mas maigting na presensiya ng kapulisan sa pagpapatupad ng minimum health protocols ay sisitahin na rin nila ang mga tao sa magkahawak-kamay, nagyayakapan, o naghahalikan sa publiko o ipinagbabawal na ang “public display of affection” upang makatulong na mapigilan ang pagtaas ng mga kaso ng hawaan.
Ang restriksiyon ay bahagi ng granular at localized move na inaasahang hadlangan ang pagbulusok ng mga kaso ng coronavirus na hindi na kailangang iutos pa ng gobyerno ang mas mahigpit na lockdown gaya ng enhanced community quarantine (ECQ), na nagresulta sa pagdausdos ng ekonomiya. Hindi na kailangang tanungin ng pulis at wala na raw silang oras para tanungin ang mga tao kung sila ay mag-asawa at nakatira sa iisang bahay. Kung nakita silang nagyayakapan, magkahawak-kamay o naghahalikan at sobrang lapit sa isa’t-isa ay awtomatikong paglabag na ito. Ang physical intimacy sa publiko ay paglabag sa health at safety protocols na itinakda ng gobyerno ayon sa pulisya.
Hindi naman aarestuhin ang mga taong nahuhuling nagsasagawa ng public display of affection subalit mabibigyan sila ng babala sa unang paglabag. Ang mga susunod na paglabag ay sasakupin na base sa umiiral na mga ordinansa ng mga local na gobyerno kung saan nagana pang paglabag.
Gaya ng inaasahan ay umani na naman ng batikos at puna ang nasabing kautusan mula sa ilang mga tao lalo na sa social media. Pati ang dalawang senador ay sinabing walang kakuwentakuwenta at tinuligsa kautusang ito na isang kaestupiduhan na restriksiyon. Tinutulan din ang kutusang pag-aresto ng mga pulis sa mga lumalabag sa health protocols dahil nagpapakita lamang daw ito ng militarisayon na pagtugon sa pandemya.
Hindi na natin kayang ibaba ang ating bantay laban sa virus, lalo na sa pagkakatong ito kung saan abot-kamay na ang inaasahang (pinapaniwalaang) lunas na bakuna at nag-umpisa na ang pagbabakuna sa bansa. Una sa lahat, kung marunong lamang tayong sumunod sa mga batas, kautusan at ordinansa daano man ito kapayak o katawa-tawa kung tingnan ng ilan ay hindi lulubha at lalaganap ang hawaan, dahil kung disiplina lamang ang paiiralin ay tiyak na magagapi natin ang sakit kahit sa simplemg kautusan gaya ng pagbabawal ng PDA.
Malay mo sa simpleng kautusan na ito ay malaki pala ang magiging epekto dahil lahat na ng posibleng paraan ay gagawin manalo lamang tayo sa laban. Isa pa, muli nating balikan ang lumang kasabihgan na… “sa ikauunlad ng bayan, disiplina ang kailangan”. Idagdag na rin natin ang pagpipigil.

Amianan Balita Ngayon