Kilusan ng NPA, umiigting sa CAR at Ilocos Sur

September 30, 2017 Provincial

LUNGSOD NG BAGUIO – Nagresulta sa pagkakumpiska ng mga gamit pandigma at pagsuko ng isang rebelde ang magkakaibang pag-atake kamakailan ng mga kasapi ng New Peoples Army (NPA) sa Kalinga at Abra sa Cordillera at Salcedo sa Ilocos Sur.
Inatake ng mga komunistang gerilya ang isang detachment ng Civilian Armed Forces Geographical Unit (Cafgu) sa bayan ng Bucloc sa Abra noong hapon ng Setyembre 27.
Ayon kay Diego Wadagan, tagapagsalita ng Agustin Begnalen Command ng NPA sa Abra, ang naturang pag-atake ang kanilang ambag sa utos ng NPA national command na magsagawa ng mas maraming taktikal na opensiba laban sa gobyerno at bilang pagpataw ng parusa sa 24th Infantry Battalion ng Philippine Army at sa grupo ng Cafgu dahil sa kanilang “blood debts” sa mga Abrenian.
Ang mga rebelde ay lumapit sa naturang detachment sa Barangay Labaan at nagpaputok ang mga ito bago agad na umatras, ani Wadagan.
Sinabi ni Wadagan na kabilang sa “blood debts” ng mga sundalo at paramilitar na inatake nila ay ang pagbomba sa mga komunidad noong nakaraang taon na nakaapekto sa buhay at kabuhayan ng mga residente lalo na sa kanilang mga pananim.
Dagdag pa ni Wadagan, ang Cafgu detachment ay nasa loob ng isang pamayanan na isang paglabag sa International Humanitarian Law.
Samantala, sumuko ang isang kasapi ng NPA sa Kalinga noong Setyembre 24 matapos na diumano ay masugatan ito dahil sa pagguho ng lupa sa Gaang Gold Mining sa bayan ng Balbalan.
Ayon kay Police Chief Superintendent Elmo Francis Sarona, director ng Police Regional Office-Cordillera, si Joseph Lumaday Masadao, kilala rin bilang “Ka Ronald”, 53, single, residente ng Sitio Ubel, Gawaan, Balbalan, Kalinga, ay humingi ng tulong mula sa mga opisyal ng barangay.
Matapos na makunbinsi ng mga opisyal ng barangay, si Masadao ay boluntaryong sumuko upang maipagamot ang natamong pinsala sa katawan.
Dakong 4pm ng naturang araw, ang dating rebelde ay tinanggap ng pinagsanib na miyembro ng Balbalan municipal police office, Regional Public Safety Battalion at ng 50th Infantry Battalion.
Agad itong dinala sa Western Kalinga District Hospital at kalaunan ay inilipat sa Kalinga Provincial Hospital sa Tabuk City.
Ani Sarona, sinabi ni Masadao na kasapi ito ng Milisyang Bayan (MB) sa ilalim ng Marcial Dagay na may operasyon sa Kalinga at kalapit na probinsiya.
Ang dating rebelde sa ngayon ay napasailalim sa proteksyon ng hukbo ng gobyerno upang masiguro ang kanyang seguridad at maiproseso ang mga benepisyo at pinansyal na tulong para makapagbagong-buhay ito.
Sa Rehiyon1, nasamsam ang magkakaibang kagamitan ng mga rebelde na kinabibilangan ng mga dokumento, mga bala, bandolyer, isang sako ng mga damit at gamit pangluto sa operasyon ng hukbo ng goyerno noong Setyembre 25 (Lunes), makaraan ang pakikipaglaban sa mga NPA sa Salcedo, Ilocos Sur.
Noong Linggo ng hapon, ang miyembro ng 81st Infantry Battalion ay nakipagsagupaan sa tinatayang 15 na rebelde sa loob ng 30 minuto sa barangay Madarang at nakuha ang isaang M653 Rifle, dalawang rifle grenades, tatlong Improvised Explosive Devices (IEDs), isang binocular, 50 metrong haba na kawad, isang ICOM radio na may dalawang charger, mga dokumento, personal na kagamitan, at ilang gamit sa panggagamot.
Iniwan ng mga tumakas na rebelde ang mga naturang gamit pandigma, ani Lt. Col. Eugenio Julio Osias, komander ng 81IB.
Isang sundalo ang bahagyang nasugatan, pag-amin ni Osias.
May mga nakita ring mga bakas ng dugo na nagpapahiwating na ilang rebelde ay maaaring nasugatan o namatay ngunit binuhat ng mga kasamahang rebelde nang umatras ang mga ito, ayon pa rin sa komander.
Sinabi ni Osias na ang mga residente ang nag-ulat sa presensya ng mga rebelde sa kanilang lugar dahil diumano ay nagsasawa na ang mga ito sa paulit-ulit na pangingikil ng mga rebelde.
“For almost 6 months now, we have been tracking them down, monitoring their movements and made coordination with the local residents that they have disturbed. This is the third encounter since July, and this is a clear manifestation that the community is with us in ending the problem of insurgency in Ilocos Sur,” ani Col Henry Robinson Jr., komander ng 702nd Brigade.
Nakiusap naman si Osias sa lahat ng sektor, lalo na ang mga lokal na opisyal, na makipagtulungan sa mga hukbo ng gobyerno. “It is not just us, the Army, that will solve this insurgency, but all of us. What we are doing is not for our own selves but for the people of Ilocos Sur, and the Filipino people, as a whole.” May ulat sina ACE ALEGRE at LIZA AGOOT / ABN