Kris, umepal kay Digong? What?

February 11, 2017 Daplis Walang Mintis Opinion

Kris Aquino, ang kapatid ni dating pangulong Noynoy Aquino, umepal kay Pres. Duterte? Susmaryusep! Parang di kapani-paniwala ngunit mismong si Pres. Digong ang nagbulgar na nagpadala ng text message sa kanya si Kris Aquino para umano ipakiusap na huwag naman ipakulong ang kanyang kapatid na si Noynoy. Sabi nga ni Digong: “si Kris, nag-text. Sabi, huwag mo namang ipakulong si Noynoy.” Bakit nagkaroon ng ganitong eksena na mismong ang artistang kontrobersiya rin sa tunay na buhay ang lumapit na kay Digong? Talagang masalimuot ang mga pangyayari, hane? Pero mas maganda kung uriratin nating maigi ang isyu:

******

Kamakailan, dumaplis si Pres. Duterte na muling buksan ang Mamasapano investigation at linawin ang maraming katanungan sa mga ginawa at hindi ginawa noon ni dating Pangulong Aquino. Dahil dito, sinabi ng pangulong Digong na bubuo siya ng isang komisyon para imbestigahan ang SAF44. Sa talumpati nga kamakailan ni Digong sa harap ng mga pamilya ng SAF 44 na ang planong mabubuong komisyon ay tulad sa Agrava Commission na kakatawanin ng mga taong may dangal at integridad para tapusin ang imbestigasyon. Kasi nga naman, sina dating PNP Chief Purisima at dating SAF Chief Napenas pa lang ang nadidikdik. Katunayan nga ay nakapag-piyansa na si Purisima dahil sa mga kasong isinampa sa Ombudsman. Pero malakas ang ugong na bakit daw hindi idinawit si Pangulong Noynoy na siya diumano ang nag-utos sa naturang operasyon. Kaya ang daing na yan ang naging dahilan upang magpa-imbestiga si Pangulong Duterte. Na ang ibig sabihin: kung sino pa ang mga dawit sa kaso ay dapat malantad at mananagot sa batas. In short, hindi ligtas sa imbestigasyon ang dating pangulong Noynoy, di ba? Yan kaya ang dahilan kung bakit nag-text si Kris kay Digong?

******

Sa text daw ni Kris kay Pres. Duterte, tiniyak niyang hindi siya naghahanap ng away. Naku ha? Sagot naman ni Digong: “No Kris. I am not out to find faults. I just want to know the truth!” At ang ikinagulat ng marami, binawi kamakailan ni Digong ang kanyang pangakong bubuo ng isang komisyon para imbestigahan ang SAF 44. Wow, ang bilis ng hatak ni Kris, hane? Pero, teka lang mga pards ang text kaya ni Kris ang dahilan sa biglang pagkambio ni Digong? Ito ang sagot ni Digong na dapat unawain at tanggapin ni Kris: “I am not going ahead with the creation of a commission because apparently, the Ombudsman has said that it’s still pending before them. I do not want to have a multiple incongruity especially if one finding fights with the other. So, hintayin ko na lang!” Malinaw ang rason. So ibig sabihin, hindi pinatigil ni Digong ang pagbuo ng bagong komisyong mag-iimbestiga muli sa Mamasapano dahil lamang sa pakiusap ni Kris na huwag ikulong ang kapatid na si Noynoy. Pero may mga naririnig kaming upak ng mga maalam sa legaledad: Bakit daw hiniling ni Kris kay Duterte na huwag ikulong ang kapatid na si Noynoy? Aminado ba siya na dawit talaga ang kanyang kapatid sa nangyaring masaker sa Mamasapano? Mas maigi raw na tumahimik na lang siya upang hindi raw medyo buking. He he, parang mababaw yata ang istorya ng pelikulang gustong i-direct ni Kris, sabi nila. In short – ampaw! Ang masakit, hindi si Digong ang uri ng taong madaling kapitan ng Epal. Kung ang tuhod ni Leni, nabiro niya, baka naman balakang ni Kris ay madamay pa. Kaya hintayin na lang natin ang say ng Ombudsman bago tayo humusga. Sa amin kung sinong nagkasala sa Mamasapano, dapat panagutin sa batas. Amen. Adios mi amor, ciao, mabalos!