Kudos, mga idol!

September 16, 2019 Sirmata ken Tagtagainep ni Mang Gusting

Naimbag a malem, agsapa, wenno rabii yo amin kakaarruba, gagayyem ken kaginginnura. Sapay koma ta napia kay latta a kanayon nangruna kadagiti suki mi nga ABN READERS. Panawen manen manen ti nepnep kailian, agannad tayo koma laeng. Adda man bagyo wenno awan ditoy batugmi a langit, no nakalagip, manso latta ti todo na.

Anian a nagnaynayed ti tangatang bayat a sursuraten tayo daytoy a kolum tayo. Kabarangayan, kakalugaran ken kakayong mi ida. Isu a dayta, kunam la no piesta kadagiti bubong ti babbalay iti kaadu ti naibalaybay a labada. Kasta met kadagiti alad.

Ngem ania ngata met ti pinasar dagiti pagay wenno raep tayo, kadakayo patgen mi a maibilang a duri ti pagilian. Ngem iti napalabas, nalablabes pay ngem kapigsaan a bagyo wenno allawig ti damag maipapan iti kasla pannakailupekpek dagiti mannalon gapu iti kinalaka ti irik idinto ta nagdakkel ti inputs wenno gastos da iti panagtalon.

Gapu daytoy ti kabarbaro a linteg maipapan iti panagangkat wenno panaggatang iti bagas. Adu payen dagiti naipadamag a sumadot dan nga agtalon gapu iti daytoy.

Ania pay ti lamoten wenno kanen tayo no awan agtalon? Makan tayo aya dagiti kuarta tayo no mabisin tayo? Idinto ta ti Pilipino ket innapoy ti kangrunaan a taraon daytoy.

Pabasolen da pay ketdi ti maysa a senadora gapu iti mapaspasamak ita kadagiti apit nga irik ta sobra ti kinalakana idinto ta nagngina ti panaggatang kadagiti abuno ken dadduma a kasapulan da nga agtalon kas koma iti gasolina kadagiti agar-aramat iti kuliglig ken traktora.

Apay, agpannuray tayo kadi latta manen iti ma-import a bagas manipud iti sabali a pagilian? Ta ania ti rason a kaykayat da ti kastoy? Gapu ngata iti makittab da manipud iti paggatang ti ahensia nga akin-tangngel iti panaggatang iti bagas?

Apow, kayong, agsalsaludsod kami laeng, ta tonetolenada ti gatangen da a bagas manipud sabali a pagilian. Uray piso laeng kunamon ti makittab wenno mangalngal da iti tunggal kilo, anian a pirak ti maibulsa da. Wen, pudno.

Adu ti maangkat a bagas iti sabali a nasion ngem kas maysa a pagilian, masapul a masustintuan na ti taroan ti umili na ta kasanun no awan maangkat na?

Ken uray ngatan nagngina, kasapul a gumatang ta awan ngaruden makan dagiti umili. Koma, kadagiti madaydayaw ken mararaem nga opisyal tayo a nabutosan ken naipatugaw a mangibagi kadagiti umili maysa daytoy nga ipangpangruna da, saan ket a maymaysa lattan ti nakaiturongan ti imatang da?

Ti met lattan maipapan kadagiti adda mabalin na wenno impluwensiado a nabalud gapu kadagiti makuna a kadagsenan a pannusa a naikkan iti gundaway a mawayawayaan, adda payen nangibaga a magatang ti temporario a wayawaya. Uray sadinonsan a lugar wenno benneg ti gobierno, addan korapsion na.

Kudos kadagiti idol wenno opisyal a mangipatpatungpal kadagiti nasken hga ipatungpal da kadagiti masakupan da kas koma kadagiti nakaparking kadagiti kalsada nangruna kadagiti city ken barangay road a no sadino ket kangrunaan a pagpagnaan dagiti lugan, pribado man wenno pangpubliko.

Adda dagiti maluksaw a mangibaga pay a nagoperasion da manen. Dida met la kanun sumarsardeng. Iti sabali a bangir, ad-adu nga amang ti naragsakan ta limmawa dagiti kalsada nangruna kadagiti napalawa wenno na-widining a kalsada ta idi awan pay naipatungpal a baklas-plaka ken towing ordinance, nagpiesta dagiti kailian ta addan paradaan da.

Adda payen agmalem agpatnag. Ti makuna mi ket, Kudos mga idol! Uray asino pay ti agdepdeppa a kuna da, trabaho lang, walang personalan.