Law iskolar ni Gov. Pacoy, pimmasa iti bar exam

May 14, 2017 Provincial

Maysa nga iskolar ni Gobernador Francisco Emmanuel “Pacoy” R. Ortega III ti nakapasa iti Bar Examinations a napasamak idi Nobiembre 2016 ket naiwaragawag ti resulta idi Mayo 3, 2017.
Ni Atty. Marionne D. Guerrero, agdama nga Administrative Assistant II ti Provincial Accounting Office, ket iskolar ni Gov. Pacoy nangrugi idi maikadua a tawenna iti Law ken agingana iti bar exam review.
“Agyamanak unay kenni Sir Pacoy. He’s one of the reasons why I was able to concentrate and focus on my studies,” kinuna ni Atty Guerrero na napunuan iti panagyaman kenni Gobernador Pacoy a timmulong kenkuana iti suporta pinansial para iti tuition fees ken pati libro.
Ni Guerrero ket naggraduar iti Bachelor’s Degree ti Philosophy sadiay Mary Help of Christian College of Seminary, Dagupan City ken nagadal iti Law sadiay Saint Louis College, City of San Fernando, La Union. Kinunana, iti maysa a karigatan a napasamak kenkuana ket urayen ti resulta iti Bar exam ngem pinasurutan na met iti talek ken kararag ken ni St. Jude Thaddeus. “Delivering the message of success was my wife. I broke down in tears, thinking all the sacrifices, struggles and hardships paid off,” innayonna.
Adda 3, 747 ti pimmasa ti Nobiembre 2016 Bar Examinations manipud iti 6,344 a nageksamin. Lorenna C. Luna, PITO-LU / ABN