LGUs ti La Union, nakaawat ti P8M balor ti proyekto

March 11, 2017 Headlines

SIUDAD TI SAN FERNANDO – Innem a local government units ken uppat nga inland water destinations a nangabak kas kadalusan, katalgedan ken kalangtuan a luglugar iti La Union ti nakaawat ti P8million a balor ti proyekto nga agpaay iti aglawlaw ken agri-tourism.
Ti nakuna nga awarding ket napasamak iti commencement ceremony ti maika-167 founding anniversary ti probinsia sadiay People’s Hall iti daytoy a siudad.
Inpaay ti probinsial a gobierno ti La Union ti pammigbig kadagiti munisipalidad a nakaala ti kangatuan a puntos kalpasan ti naisayangkat a validation idi 2016 a naibasar iti kinadalus, urban space greening, support system iti environmental management, panangaywan ken pannakipaset dagiti umili. Naikonsidera ditoy dagiti programa iti public safety nga ipatpatungpal dagiti munisipalidad.
Para iti 1st inggana 3rd class municipality category, naala ti Balaoan ti P1.5milion a balor dagiti proyekto kas first place; second place ti Bangar a nakaala ti P1milion; ken third place ti Bacnotan a nakaawat ti P500,000.
Ti Santol ti nangiyawid iti P1milion a first prize, sinaruno ti Sudipen (P750,000) ken Caba (P500,000) ti maikatlo para iti 4th inggana 5th class municipality category.
Nangabak iti cleanest inland bodies of water ti Tapuakan River sadiay Pugo (P1million), Bulalakaw Falls sadiay Santol (P750,000), ken nag-tie iti maikatlo a posisyon ti Bagulin River ken Amburayan River (P500,000).
Malaksid iti awarding, naiparang pay dagiti nangabak iti Best Booth iti napasamak nga Agri-Tourism Trade Fair manipud Pebrero 21 inggana Marso 2, 2017 iti sango ti city hall ti San Fernando.
Naala ti siudad ti San Fernando ti first place ken ti special award kas Most Visited Booth. Maikadua ti Naguilian ken maikatlo ti Rosario.
Naikkan ti special award ti agri-tourism booth ti Sudipen a kangatuan ti naparnuayna kabayatan ti trade fair.
Nakipaset iti awarding ceremony ni La Union Governor Francisco Emmanuel R. Ortega III a nangkablaaw kadagiti municipal mayors para iti ganetget dagitoy a mangipaay ti nasaysayaat a panagbiag kadagiti masakupanda ken iti kontribusion dagitoy iti environmental management systems ken suportada iti local economic development babaen ti agri-tourism programs.
Adda 20 LGUs iti La Union a buklen ti maysa a siudad ken 19 a munisipalidad. AHF/PIA-1 / ABN