LGUs ti Pangasinan nagkari ti suporta iti anti-child program ti DOLE

October 29, 2019 Provincial

SIUDAD TI DAGUPAN – Maysa a serye ti orientation nga naangay iti napalabas a dua nga bulan ti indanguluan ti Department of Labor and Employment – Western Pangasinan Field Office (DOLE-WPFO) tapno maadalan dagiti local government units (LGUs) iti programa ti ahensia nga Child Labor Prevention and Elimination Program (CLPEP).
Iti maysa a sasao, kinuna ni Arly Sta. Ana-Valdez, information officer ti DOLE idiay Ilocos nga dagiti orientation ket naaramid iti siam nga LGU kas Alaminos City, Aguilar, Binmaley, Bolinao, Bugallon, Lingayen, Mangatarem, Sual ken Urbiztondo nga nagkari dagitoy nga LGUs iti suportada babaen ti naregget a takderda panggep ti isyu iti child labor.
“Iti maysa kadagiti ibaballaet nga situtulok nga ited dagiti LGU para kadagiti child laborers wenno children at risk of child labor ken dagiti pamiliada ket referral ken feedback, job referral ken placement, pagsapulan, panangitandudo ken panangpabilleg kadagiti agdama a mekanismo ti panangtaming kadagiti programa ken serbisio para kadagiti ubing.” Kuna ni Valdez Kinunana nga dagiti nakipaset iti orientations ket manipud saba-sabali a departamento ti LGUs, karaman dagiti pannakabagi manipud Sangguniang Panlungsod/Sangguaning Bayan Committees on Labor and Employment, government agencies kas Department of Education, Department of the Interior and Local Government, Philippine National Police ken dagiti asosasion ti persons with disabilities.
Innayonna nga dagiti topiko nga napagsaritaan iti kabayatan ti orientations ket dagiti CLPEP, Republic Act 9231, DOLE Department Order No. 149-2016, 2018 child labor profiling results, 2019 child labor target areas, referral and feedback mechanisms, ken DILG Memorandum Circular No. 73-2019.
Kasta met, kinuna ni DOLE –Ilocos Regional Director Nathaniel Lacambra nga dagiti naangay nga orientations ket napateg para iti panakaammo ken panangpalawa ti suporta para iti regget ti gobierno iti anti-child labor.
Base iti resulta ti Philippine Statistics Authority 2011 Survey on Children, addaan 2.1 milion child laborers nga agtawen lima angingga 17 tawen ditoy Pilipinas. Agarup 95 porsiento kadakuada ket adda iti napeggad a trabaho.
“Idiay Western Pangasinan, di kumurang 978 child laborers iti nabigbig nga napaayan iti nadumaduma nga serbisio ti gobierno,” kuna ni Valdez.

AMB-PIA1/PMCJr.-ABN