Liberasyon ng Marawi, ikinatuwa ng mga Muslim

October 21, 2017 Metro BLISTT

Ikinatuwa ng mga Muslim leaders sa lungsod ang balitang idineklara na ni Pangulong Rodrigo Duterte ang “liberasyon ng Marawi City mula sa impluwensiya ng mga terorista”, noong Martes.
Sinabi ni Imam Bedi Jim Abdullah, na inalala ang kaniyang pinagmulan sa Marawi na, “Praise the Almighty for the development! With the recent event, it is a welcome news.”
Aniya, masaya siyang marinig na na-neutralize na ng gobyerno sina Omar Maute at Isnilon Hapilon na namuno sa grupong umatake at kumubkob sa lungsod ng halos limang buwan.
Nagpahayag ng tiwala si Abdullah na sa pagkamatay ng dalawang lider ay tuluyan ng babagsak ang buong grupo.
“How the leader of a group thinks affects his whole organization. If his goal is to sow terror, his group will follow but if he thinks/acts for the welfare of his people, then the good things will come out of his leadership,” aniya.
Sinabi rin niya na mataas ang pag-asa nila na ang gobyerno sa ilalim ni Pangulong Duterte ay matagumpay na mare-rehabilitate ang Marawi at ibigay ang normalisasyon ng pamumuhay ng mga Muslim sa lungsod.
Siniguro ni Abdullah na ang mga Muslim pati na ang nasa labas ng Mindanao ay handang tumulong sa rehabilitasyon sa pagtatayo ng Marawi.
“While it is the obligation of the government to rebuild Marawi, we can contribute. The Muslim leaders can contribute and can give wisdom,” ani Abdullah.
Sabi pa ni Abdullah na ang giyera sa Marawi ay gumising sa mga Muslim, hindi lang sa Mindanao kundi sa buong bansa at nag-iwan ng katanungan sa kanila na nagbigay oportunidad sa gobyerno upang makita ang lumalalang isyung nakakaapekto sa kanilang komunidad.
Ang mga Muslim leaders ayon sa kaniya ay makakatulong sa pagsulong ng tunay na kahulugan ng Islam at iwasto ang maling pagkaalam at taliwas na pagtuturo na itinanim sa isipan ng iba na sanhi ng kanilang pagtalikod ang pagiging masama.
Nanawagan si Abdullah sa kapwa Muslim na, “let us maintain the smooth and the correct teaching of Islam, practice it, and we will all be well.”
Sinabi naman ng isa pang lider ng Muslim sa lungsod na si Imam Samsodin Monib na ang pagkamatay nina Hapilon at Maute ay matagal nang hinihintay na ginhawa sa maraming linggo at buwang paghihirap ng mga Muslim sa Marawi at iba pang lugar.
“Napakasaya po, para kaming nabunutan ng tinik na pinakamalaki sa lalamunan,” aniya.
Sinabi ni Monib na sa nakalipas na mga buwan ay ginagawa nila ang kanilang bahagi upang maibsan ang paghihirap ng kapuwa Muslim, kumokolekta at nagpapadala ng pera at kagamitan sa kanilang mga kapatid na nakatira sa mga evacuation center. Ito ay maliban sa pagtulong sa mga estudyante na pumunta sa Baguio para ipagpatuloy ang kanilang pag-aaral.
Ayon pa kay Monib na may halos 45 estudyante mula Marawi ang lumipat sa iba’t ibang elementarya at high school sa lungsod matapos pumutok ang giyera sa Marawi.
Sinabi niya na lagi silang naniniwala na kung magpang-abot ang kabutihan at kasamaan ay laging umiiral ang kabutihan. LIZA AGOOT, PNA / ABN