Lokal a produkto iti Rehion1 mailako iti Manila trade expo

SIUDAD TI SAN FERNANDO, LA UNION  – Agarup 53 micro, small, and medium enterprises (MSMEs) iti Region 1 ti mangipan kadagiti nagduduma a produktoda iti Manila babaen ti “Rimat ti Amianan” Exposition 2018.
Kinuna ni Department of Trade and Industry (DTI) Region 1 Director Florante O. Leal a maisayangkat daytoy iti Robinsons Place, Ermita, Manila manipud Nobiembre 4 inggana 14, 2018.
Masarakan iti nakuna a 11 nga aldaw a trade expo dagiti produkto kas kadagiti nagduduma a patanor, makmakan, novelty items, woodcrafts, alikamen ken dadduma pay a lokal a produkto dagiti MSMEs ti Region 1 a buklen ti uppat a probinsia ti Ilocos Norte, Ilocos Sur, La Union ken Pangasinan ken dagiti siam a siudad: Alaminos, Batac, Candon, Laoag, San Carlos, San Fernando, Urdaneta, Vigan, ken Dagupan.
Masarakan pay ditoy dagiti nagduduma a pangregalo ken arkos a mausar iti panangrambak ti Paskua.
Kinuna ni Leal a daytoy ti maikadua a daras nga insayangkat ti DTI ti Rimat Ti Amianan Trade Fair iti Metro Manila. Idi 1993, naisayangkat daytoy iti Hotel Nikko, Makati City.
Ti Rimat ti Amianan (Treasures of the North) Expo, ti tinawen a trade fair ti DTI-Region 1, ket addan iti maika-17 a tawen. Panggep daytoy a maipakaammo ti kaimbagan a produkto dagiti babassit ken lokal a negosiante.
Segun kenni Leal, dagitoy a produkto ket natan-ay iti tulong ti DTI babaen dagiti nagduduma a programa kas ti OTOP (one-town-one-product) Next Gen, Kapatid Mentor Me, ken Shared Service Facility. L.YPARRAGUIRRE, PNA / ABN

Amianan Balita Ngayon