LU Earth Hour 2018, narambakan iti Bauang

March 31, 2018 Headlines

BAUANG, LA UNION – Iti panagkitik ti pagorasan a kagiddan ti ungto ti panagbilang, naggigiddan a naiddep amin a silaw iti daytoy nga ili, iti probinsia ken iti sangalubongan a pannakipagkaykaysa iti panangisakit ken panangsaranay iti nakaiparsuaan nga uray iti las-ud laeng ti maysa nga oras.
Kastoy a narambakan iti Bauang ti Earth Hour idi sardam ti Marso 24.
Nagangtan dagiti kandila a 60+ iti 8:30pm iti panangidaulo ni Gov. Francisco Emmanuel Ortega III, Congresswoman Vini Nola A. Ortega, Sangguniang Panlalawigan Members Nancy Bacurnay, Ma. Anabelle de Guzman, Mannix Ortega, ken dagiti opisial ti ili nga idadaulo ni Mayor Eulogio Clarence Martin P. de Guzman III, Vice- Mayor Bonifacio Malinao ken kameng ti konseho ti munisipio, ken department heads. Amin ket nakapolo iti berde.
Kabayatanna, nasilawan ti plaza babaen iti glow in the dark sticks nga imet dagiti umili a nakasuot iti nangisit a t-shirt, pakairamanan dagiti barangay captain ken dagiti agindeg, DepEd principals, dagiti mannursuro ken agad-adal, ken empleyado ti munisipio.
“Let us continue to love our own home, Planet Earth. Let us spread the love; our love for La Union, for Bauang. We have to think globally. Let us do our part in the entire arena. Let us make our planet liveable for everyone,” kinuna ni Gobernador Ortega.
Inyarig met ni Congresswoman Vini Nola ti daga a nakaiparsuaan iti maysa nga ina, “As a loving and caring mother, she wants her children to have a beautiful life by providing all their needs, food, clothing and shelter. She likes to give everything for her children. Like Mother Earth, she wants to give us, her children, the best.”
“In return, her children must show their love and care for Mother Earth by taking care of her. Her children must preserve her beauty by showing their concern for her. If her children start to involve themselves in their own little ways now, their good deeds create a ripple effect,” innayonna.
Maysa met a karit ti indatag ni Mayor De Guzman kadagiti umili nga agpili iti nagbaetan ti inidoro wenno cellphone.
Ti kanayon a panagusar kadagiti cellphones ket makadadael kenni Mother Earth, daytoy ti impaganetget ni Regional Director Ma. Victoria Abrera ti Department of Environment and Natural Resources (DENR), Environment Management Bureau (EMB) RO1. Inlawlawagna nga agkunsumo iti enerhia ti panagusar ti cellphone, no ad-adu ti enerhia a mausar, dakdakkel met ti itdenna a pannakadadael iti nakaiparsuaan.
Adu dagiti pabuya a naiparang a nanglinglingay kadagiti nakipaset iti Earth Hour a pakairamanan dagiti kankanta ken salsala ti Baggak Municipal Band, Science of Identify Foundation (SIF) Care, Team Pacoy, Bauang Municipal Youth Choir ken Bauang Baggak Choir, Sacred Heart School, Don Eulogio de Guzman Memorial National High School.
Iti maikapat a panangrambak iti Earth Hour iti probinsia ti La Union, pinili ti probinsial a gobierno ti ili ti Bauang kas host ita a tawen. Nagserbi kas host kadagiti napalabasen a tawen ti Agoo, San Juan, ken Balaoan. BAUANG PIO / ABN