LU governance roadmap, nabigbig iti 15th PGS Boot Camp

February 25, 2017 Provincial

Nagserbi ti La Union Transformative Governance Roadmap (LUTGR) iti Basic Class ti 15th Performance Governance System (PGS) Boot Camp a naisayangkat iti The Oriental Hotel, Mariveles, Bataan idi Pebrero 15-18, 2017 tapnu mailadawan iti kinapateg ti epektibo ken epesiente a sirmata.
Idi umuna nga aldaw, Pebrero 15, bininsa-binsa ni Chris Zaens, executive director ti Institute for Solidarity in Asia (ISA) iti LUTGR iti topikona nga addaan titulo a “Getting the Fundamentals of Strategy Design Right.”
Insuro ni Zaens iti kinapateg iti panagamiris iti asbang nga umno para iti madutokan a sirmata. Inbagana nga iti LUTGR ket mangisarsarming iti kakaisuna ken napateg a posision para iti La Union babaen ti agduduma nga aktibidad tapnu masata iti sirmata iti probinsia nga agbalin a sentro iti Agri-tourism iti Amianan a Luzon intono 2025.
Inbaga ni Zaens a ti LUTGR ket napayos a wagas para kadagiti local government unit (LGU) ken national government agency (NGA) a madama pay laeng nga agsagsagana iti sirmatada. Kinunana pay nga iti LUTGR ket mangpaay iti naisalsalumina ken masingangar a posision para iti La Union. Saan laeng datoy a mangipakpakita kadagiti gunay a kasapulan a maaramid, makita pay iti relasion dagitoy a gunay iti maysa ken maysa. Kas resultana, iti sibubokel a roadmap ket mangpapaay iti masingangar a bentahe a mangiwaywayat iti pannakaamiris iti sirmata iti La Union.
Idi maikatlo nga aldaw, Pebrero 17, inusar met ni Francis Gentoral iti LUTGR kas wagas iti epektibo ken episiente a panagaramid iti daremdem. Inpaay ni Gentoral iti padasna idi kaduana a nangbukel dagiti kameng iti Probinsial a Gobierno ti La Union (PGLU) nga idadaulwan ni Gob. Francisco Emmanuel “Pacoy” R. Ortega III, iti sirmata iti probinsia. Inpaayna nu kasanu a nainnayad a nagkaysaan iti pannakapili iti sirmata tapnu umno kadagiti kasapulan iti probinsia.
Manamnama nga iti pannakaamiris iti sirmata iti probinsia ket mangpadur-as iti kinakompetitibo iti kalidad iti biag iti La Union.
Iti Basic Class ket nasarunuan iti Master Class idi Pebrero 20-22, 2017 iti isu met laeng a lugar. Ti Basic Class ket nakasentro kadagiti pundasion a konsepto iti PGS kabayatanna a ti Master Class ket nakatutok kadagiti case study a mangladladawan iti strategy monitoring and sustainability. Israel O. Rudio, Provincial Information & Tourism Office / ABN