LU Surfing Break, hall of famer iti best sports tourism event

October 14, 2017 Headlines

LA UNION – Maysan kadagiti natudingan nga hall of famer ti La Union Surfing Break (LUSB) kalpasan a napadayawan manen daytoy kas Best Tourism Event in the Philippines (Sports Category) babaen ti Department of Tourism ken ti Association of Tourism Officers of the Philippines (DOT-ATOP) kabayatan ti 18th ATOP National Convention Pearl Awards idi Oktubre 6, 2017 sadiay Iloilo Convention Center, Iloilo City.
Naited iti La Union Surfing Break ti Hall of Fame Award gapu ta tallo nga agsasaganad a tawen a napadayawan daytoy kas best tourism event sipud idi 2015. Naala ti LUSB ti nasao a pammadayaw idi 2012 ken 2013 bayat a nag-2nd place daytoy idi 2014 iti agpada a kategorya.
Ti ATOP Pearl Awards ket maysa nga award-giving body a mangmangted iti pammigbig kadagiti naisangsangayan nga aramid ken panagserbi dagiti adda iti industria ti turismo.
Ti award a naala ti LUSB ket mangipakpakita kadagiti naisangsangayan a gay-at ken proyekto ti probinsial a gobierno ti La Union (PGLU) a paset ti napaspas a dumakdakkel nga industria ti turismo iti probinsia. Binigbig daytoy ti ganetget dagiti tao a nangisakad tapno agballigi ti tinawen a pasken.
Ti LUSB ket maysa a multi-sectoral tourism project ti PGLU iti pannakitinnulong ti DOT-RO1, munisipal a gobierno ti San Juan, La Union Conventions and Visitors Bureau, San Juan Resort Restaurant Hotel Association Inc., ken La Union Surf Club. PITO-La Union / ABN