Magsasaka, patay sa pananaga sa La Union

November 25, 2017 Police Patrol

NAGUILIAN, LA UNION – Patay ang isang 33-anyos na magsasaka dahil sa natamong mga saksak at taga nang natagpuan itong nakabulagta sa kahabaan ng Bessang Road ng Barangay Lioac Norte bandang 6am ng November 21, 2017.
Kinilala ni Chief Inspector Cirilo Butigan Jr., hepe ng Naguilian police, ang biktima na si Robert A. Lagasca, 33, residente ng Barangay Gusing Norte, Naguilian, La Union.
Natagpuan ng Scene of the Crime Operatives (SOCO) ang 24 stab wounds at taga sa leeg na ikinamatay ng biktima.
Ayon sa pamilya ng biktima, lumabas si Lagasca sa kaniyang tahanan bandang 3:30am upang mamili ng mga scrap ng newspapers sa Baguio City na gagamitin sa kanilang sakahan, subalit, natagpuan na lang na walang buhay si Lagasca sa nasabing kalsada.
Ayon kay Butigan, naghahanap pa rin sila ng posibleng lead sa kaso kung ang biktima ay naharang ng suspek sa kahabaan ng kalsada na motibong nakawan, subalit naghahanap pa rin sila para sa higit pang imbestigasyon.
Sa crime scene noong Martes, hindi makilala ng mga pulis ang biktima dahil kulang sa impormasyon, “the victim has no identification (ID) or cellphone, aside from his clothing’s, just only a men’s hair comb recovered on his right back pocket jeans,” ani Butigan.
Unang naiulat sa himpilan ng pulis ang insidente kung saan nakita ng mga rumespondeng pulis ang biktima, na nalaslas ang leeg, ilang metro mula sa kaniyang motorsiklo (ZJ 4679).
Nakipag-ugnayan si Butigan kay Chief Inspector Melani Joy Ordoño, team leader ng SOCO Police Regional Office 1, para sa forensic investigation.
Unang lead ng insidente ay ang Official Receipt Certification of Registration (ORCR) ng motorsiklong nakarehistro sa pangalan ni Edward Apiado Soriano ng Brgy. Acao, Bauang, La Union, at napag-alamang naka-confine sa isang ospital dahil sa sakit, “the bike was possibly sold to the victim,” ani Butigan.
Ayon kay Ordoño, ang biktima ay nakilala lamang sa suot na Levis denim blue pants, blue shirt, olive green hooded sweatshirt, at maroon Adidas rubber shoes. Ang pagkakalilanlan sa biktima ay nasa pagitan ng 30-35 anyos, medium built, 5’3 ang taas. Maliban sa ORCR na nakuha sa motorsiklo, nakita rin ang ilang barya, ilang motor brake spare, tools, at Swiss knife. ERWIN BELEO