Magsasaka, tinaga sa Benguet

LA TRINIDAD, BENGUET – Isinugod sa ospital ang isang magsasaka matapos itong tinaga gamit ang itak ng isang 27 anyos na lalaki.
Sa ulat ng Benguet police, dakong 8:30 ng umaga noong Marso 6 nang makatanggap sila ng tawag mula sa Benguet General Hospital-Emergency Room tungkol sa pananaga.
Pahayag ng ama ng biktima na si Carias Dimas, 54, magsasaka at residente ng Talinguroy, Wangal, Benguet, dakong 7am ng parehong araw ay inaayos niya ang kanyang water pump para sa mga pananim nang nakarinig siya ng malakas na sigaw na nanggagaling sa sapa.
Tinignan niya ito at nakita niya ang suspek na si Abel Cariño Ferraro alyas Jepon, 27, residente ng parehong barangay, na patungo sa lugar ng biktima na si Edward Cariño Dimas, single, residente rin sa lugar.
Sinuntok diumano ng suspek ang biktima kaya nahulog ito sa sapa. Nagpatuloy pa ang kanilang suntukan hanggang sa halamanan sa itaas ng sapa. Nang nakahandusay na ang biktima, kinuha ng suspek ang kanyang bolo at tinaga ang biktima sa kaliwang bahagi ng kanyang likuran.
Dagdag pa ng ama ng biktima, habang sila ay naghihintay ng sasakyan, nagpunta ang suspek sa kanilang bahay at pinagbantaan siya na babarilin.
Nang ang suspek ay may kukunin sa kanyang bewang ay inawat na ito ng nakakatandang kapatid nito.
Naisugod sa ospital ang biktima sa tulong ng kanyang mga kamag-anak at kasalukuyang ginagamot.
Kinasuhan naman ng alleged frustrated murder ang suspek. MARK BROZULA VILLAFLORES, UB Intern

Police Patrol

AMIANAN POLICE PATROL

Amianan Balita Ngayon