Maika-200 tawen ti Ilocos Norte, marambakan

Headlines

SIUDAD TI LAOAG, ILOCOS NORTE – Maluktan ti naisangsangayan a pannakarambak ti maika-200 a tawen ti Ilocos Norte inton Pebrero 2, 2018 babaen ti 7th edition ti Tan-ok ni Ilocano.

Manamnama a daytoyen ti kapatgan a panangiparang iti “Tan-ok” a manipud idi 2011 inggana 2016 ket maisaysayangkat kadagiti maudi a bulan ti tawen kas maysa a panagsasalisal dagiti nagduduma a pista dagiti siudad ken il-ili ti Ilocos Norte nga inrugi ni Gob. Imee Marcos tapno parangrangen manen ti kinatan-ok ken panagkaykaysa dagiti Ilokano.

Aglalo pay a maipakita ti kannawidan ken pakasaritaan ti probinsia babaen kadagiti nagduduma a naisagana nga aktibidad iti bicentennial anniversary daytoy.

Segun kenni Ilocos Norte Tourism Officer Ianree Raquel, ti bicentennial theme ket nakasentro iti saludsod, “Ania ti maipannakkel mo kas Ilokano?”

“There is a need to come together as a province and really think about the meaning of what being an Ilocano is. This will be a time not just to look to the past, but also to examine the present and reflect on what we can do to bring the province forward,” kinuna ni Raquel.

Mapasamak ti bicentennial parade iti Laoag City ken ili ti San Nicolas inton Enero 26 bayat a dagiti pasalip kas ti singing, digital poster-making, ken quiz show iti Robinsons Place Ilocos iti maika-27.

Pebrero 15 ti “Open Capitol,” maysa nga office exhibit iti Provincial Capitol tapno mangipakita iti transparency ti gobierno. Kagiddan daytoy ti centenary commemoration ti Capitol building.

Sumaruno ti “I Love Ilocos Norte” Concert iti maika-16 ken ti Sirib Awards, maysa a programa a mangted pammadayaw kadagiti agtutubo nga Ilokano a nangabak wenno nakaala ti pammigbig iti national ken international a pasalip. Ti Sirib ket inorganisar ti Ilocos Norte Youth Development Office (INYDO) kadwa ti “Taray ni Ayat” fun run iti Pebrero 17.

“We’ve got some plans for a joint celebration with Ilocos Sur, but we haven’t finalized the lots,” kinuna ni Marcos.

Ti dati a Provincia de Ilocos, 200 a tawen ti napalabas, ket nagsina babaen ti maysa nga Spanish Royal Decree iti maawagan tatta nga Ilocos Norte ken Ilocos Sur.

Daytoy ti nakaigapuan ti nagsasaruno a rebolusion idi 1807, 1810, 1812, ken 1816, a kangrunaan iti aminan ti Ilocos province.

Kalatakan kadagitoy ti maaw-awagan a Basi wenno Ambaristo Revolt nga indauloanda Pedro Mateo ken Saralogo Ambaristo tapno supiaten ti gandat a monopolia iti basi dagiti ganganaet nga Espaniol.

Ti basi ket maysa a kangrunaan a paset ti kannawidan ti Ilokano a maus-usar kadagiti napapateg a pagteng ti panagbiag manipud iti panagpasngay ken panagkallaysa inggana iti panangipunpon kadagiti minatay.

Numanpay naabak dagiti rebelde, ti nasao a rebelion ti nagbalin nga inspirasion tapno lumaban dagiti Ilokano iti pananglupek dagiti Espaniol a maysa kadagiti kangrunaan a paset ti final revolution a nangwaya-waya iti pagilian manipud iti turay dagiti Espaniol. ACE ALEGRE / ABN