Maika-7 nga Ayat Festival ti La Union, nangrugin

AGOO, LA UNION – Narugian babaen ti maysa nga street dancing competition a nakipasetan dagiti estudiante ti probinsia ti 7th Ayat Festival idi Setiembre 15 ditoy nga ili.
Inpakita amin a nakipaset iti aktibidad ti kultura, adal, ken tradision manipud kadagiti nagtaudanda nga il-ili.
Pakaibilangan dagiti nakisalip ti Kawayan Festival ti Sudipen, Bangus Festival ti Aringay, ken Dinengdeng Festival ti Agoo.
Sinala dagiti street dancers ti Santo Tomas ti maipapan iti Daing Festival, kabayatan a Baggak Festival dagiti Bauangeños ken Pindangan Festival dagiti naggapo iti San Fernando City.
Iti mensahena nga inbasa ni Board Member Christian Rivera, kinuna ni Governor Francisco Emmanuel Ortega III, “This is a celebration of Ilokano culture, traditions, values expressed by our Ilokano language that binds and connects all of us.”
“All these are rooted from the love of the land and the inspiration from the history of the province,” innayonna pay.
Kalpasan ti pasalip, naala ti Santo Tomas ti championship ken nakaawat ti P80,000 cash prize. Agoo ti first runner-up a nangabak ti P50,000 bayat a ti San Fernando City ti second runner up a nangiyawid ti P20,000.
Amin a saan a nangabak a grupo ket nakaawat ti sag-P20,000.
Kas paset latta ti opening program, naisayangkat ti elimination round ti La Union Henio. Nagpipinnalaing dagiti estudiante a nangpugto kadagiti sao nga Ilokano.
Ti tallo a nangabak a pares manipud iti maikadua a distrito ti La Union ti mapan iti provincial grand finals.
Dagiti sabali pay a nailatang nga aktibidad ti Ayat Festival ket pakaibilangan ti Iskrabiloko (scrabble nga agusar iti sao nga Ilokano), Salip ti Deklamasyon, ken ti elimination round ti Ilokano Chorale idi Setiembre 19.
Maangay ti pangleppas a selebrasyon iton Oktubre 11 babaen ti awarding ti Kampeon ti Lengwahe ken dagiti nangabak kadagiti nagduduma a pasalip.
Ti tema ita a tawen ket “Sangsangkamaysa a panagpitik dagiti puso nga agay-ayat iti La Union”. JOANNA DIAZ SABADO, PIA-La Union / ABN

Amianan Balita Ngayon