Makaulawen ti panawen

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Sakbay man ti amin, kabarangayan, kailian kakayong mi ida, adtoy man ti maysa a pagraray-awan tayo. Iti naminsan naladaw ni Boyet iti klaseda ket inungtan ken dinamag ti Maestrana no apay, ket kastoy ti eksena:

Maestra: Boyet, apay a naladawka manen?

Boyet: Kua, Mam—jay kua—

Maestra: Ammom kadi nga ita ti submission ti homework yo? Late ka manen.

Boyet: Nahold-up-ak maam. Sorry…

Maestra: Ania, ket ania ti naalada kenka? Selfon, kuarta, ania?

Boyet: Ti assignment ko, Maam, huhuhuhu.

Maestra: Whatttttttttt!

Di wowww, hahahaa, sirib ti tukling a balo…diyo tultuladen ha ubbing.

Ala, sapay la koma ta naregreg ti stress kadagiti ruprupayo ket saan a nanayonan ti kuretret dita mugging yo ta ne, saan nga agpapada ti parikut dagiti kakailiantayon. No ditoy batug mi a langit ket, nasuroken a makalawas a di masirayan ti init gapu iti todona, adun ti mangidawdawat iti panagsardengna nangruna kadagiti umangpepen ti linabaanna. Ngem, kasanu itan kakayong mi ida, asino itan ti ipangag ti Apo ken patganna ta adda met dagiti lugar a kasta unayen ti panagdawatda wenno ararawda nga agtodo koma wenno makaramanda metten iti damo a bisibis wenno arbis ti Mayo a kunada. Adda payen nagkuna a saan laeng a taltalon ti matikagan ngem ketdi urayen ti—sus maria kusina…unayen dayta Kayong John Cruz dita Jones, Isabela aya, agingga kanu ita ket wan pay todona. Ano ba yan?

Kayat a sawen, Kakayong, saan nga agapapadan ti intay mapaspasaran. Iti met dippaarna ti Cagayan Valley, umar-ararawda met iti todo tapno uray kaskasano ket lumamiis kanu met ta palalu ti dagaangna. Iti met dipaarna ti Ilocos Norte, kasta unay ti namsaakanna ta uray la naglaylayos met iti sumagmamanu a lugar nangruna iti siudad ti Laoag. Dagitoy kadi kakayong ket mangipaneknek a nagbaliw a talagan ti panawen ken paniempon? Sus Maria kusina, mapantayonsa manen iti climate change ken global warming no kastoy laeng.

Malagipko gayam ti nabasak a waragawag ti taga-ahensia a mangsakup iti panagginggined kakayong. Nakabutbuteng ti waragawagda a no adda mapasamak a panagginggined iti central Luzon ket possible nga adu ti madangran wenno matay. Sus makapakintayeg daytoy a waragawagda, no maminsan, adda pagdaksan daytoy, adda met pagimbaganna…apay kunayo ngata? Nupay kunada a di pulos ma-predict idi ti ginggined ngem gapu iti kinasiriben ti tao mabalin dan a maibaga a possible nga adda mapasamak a ginggined ta addan dagiti kabaruanan a ramitda. Ngem iti biang tayo ania, no dagitoy koma a damag, uray saandan nga iwaragawag ta mangyeg laeng iti buteng kadatayo. Saan kadi Kayong Angkuan? Ngem iti sabali met a bangir, nasayaat no adda dagiti nasapa a pakdaar dagitoy nga opisina tapno makapagsagana tayo. Ngem kadagitoy a tiempo, Kakayong, awan kasayaatan no saan nga agkararag iti Apo a Namarsua nga ilisi natayo iti peggad ta ti kararag pay laeng ti kabelgan a salaknib wenno kalasagtayo.

Ala ngaruden, kasta pay kakayong ta ne overtime tayo manen…babayoo, tsup tsup muahmuah.

Sirmata ken Tagtagainep ni Mang Gusting

Amianan Balita Ngayon