Malalaking proyekto ng NIA, nakahanay sa Rehiyon1

August 27, 2017 Provincial

URDANETA CITY – Itinakdang sisimulan sa 2018 ang malalaking proyekto ng irigasyon sa Rehiyon I na inaasahang maghahatid pa ng karagdagang serbisyo sa mga benepisyaryo ng lugar.
Ayon kay National Irrigation Administration (NIA) Regional Director John Celeste, habang ang mga proyekto ng 2017 ay kasalukuyang ginagawa, ang budget deliberation sa Committee on Appropriations para sa 2018 project ay tapos na at itutuloy na lamang sa Plenaryo.
“We have several special projects in 2018 for the improvement of our irrigation projects na mapapakinabangan ng ating farmers at kababayan hindi lang dito sa atin sa Region I kundi pati nearby regions,” ani Celeste.
Sa Pangasinan, magsisimula sa susunod na taon ang konstruksiyon ng ikatlo at huling phase ng Agno River Integrated Irrigation Project o Lower Agno River Irrigation System Improvement Project (LARISIP).
Sinabi pa ni Celeste na ang LARISIP ay may service area ng 12,600 ektaryang sakop ang anim na munisipalidad: tatlo sa Pangasinan, dalawa sa Tarlac at isa sa Nueva Ecija.
Magsisimula rin sa susunod na taon ang isang pipeline project sa Ilocos Norte na may estimated cost na P26.7 billion. Ang pagmumulan ng tubig ay ang Palsiguan River ng Abra.
“Ang mapapatubigan nito ay Ilocos Norte at Ilocos Sur. Ang pakinabang naman ng Abra ay power generation dahil mataas itong reservoir dam,” paliwanag niya.
Makikinabang din sa irrigation projects ang bayan ng Gregorio Del Pilar sa Ilocos Sur. Sa kasalukuyan, ang mga proyektong ito ay kinakailangan pang pumasa sa pamamagitan ng iba’t ibang konsultasyon sa mga maaapektuhang residente at munisipalidad ngunit, ani Celeste, ang plano ay feasible technically at financially.
Para sa maliit na dam projects na may taas na 20 hanggang 40 metro, dalawang bagong Small River Impounding Projects (SRIP) ang mapapakinabangan ng second districts ng Pangasinan sa bayan ng Bugallon para sa Dumoloc SRIP at Barangay Bayaoas sa bayan naman ng Aguilar para sa Aguilar SRIP.
Sinabi pa ni Celeste na ang pagkukumpuni at rehabilitasyon ng mga kanal na nasira ng mga bagyo at baha ang dahilan kaya abala ang mga trabahador ng NIA upang masiguro na ang mga pasilidad ng irigasyon sa rehiyon ay magagamit sa tamang layunin. VHS, PIA-Pangasinan / ABN